Sindhudurg News : काजू बीच्या हमीभावाबाबत शासनाकडून कोणताही ठोस निर्णय न झाल्यामुळे संतप्त झालेल्या काजू उत्पादकांनी रविवारी (ता.१०) रास्ता रोको आंदोलन केले. या आंदोलनादरम्यान उत्पादकांनी जोरदार घोषणाबाजी केली.

सिंधुदुर्गातील काजू बी दराचा विषय दिवसेंदिवस गंभीर बनत आहे. सध्या काजू बी ला प्रतिकिलो ११५ ते १२० रुपये दर मिळत आहे. त्यामुळे काजू उत्पादक हैराण झालेले असून विविध संघटनांनी शासनाकडे काजू बी ला प्रतिकिलो २०० रुपये हमीभाव द्यावा, अशी मागणी केलेली होती. अधिवेशनात निर्णय घ्यावा अन्यथा आंदोलन करू असा इशारा दिला होता.

परंतु काजू उत्पादकांच्या मागणीकडे दुर्लक्ष झाल्याने संतप्त झालेल्या दोडामार्ग आणि सावंतवाडी तालुक्यातील उत्पादकांनी दोडामार्ग येथील गणेशमंदिर ते बाजारपेठेतील मुख्य चौकापर्यंत मोर्चा काढला. या वेळी ‘शेतकरी फळबागायतदार संघाचा विजय असो’, ‘काजूला हमीभाव मिळालाच पाहिजे’, अशा घोषणात देत दोडामार्ग येथील बाजारपेठेतील मुख्य रस्त्यावर रास्ता रोको आंदोलन सुरू केले.

शेकडो काजू उत्पादकांनी रस्त्यावरच ठाण मांडल्याने वाहतुकीची मोठी कोंडी झाली. वाहनांच्या रांगाच रांगा लागल्या. संतप्त झालेले काजू उत्पादक (Cashew Production) जोरजोरात घोषणाबाजी करीत होते. आठवडाबाजाराच्या दिवशी आंदोलन केल्याने वाहतूक पूर्णतः विस्कळीत झाली.

तिलारी, गोवा, सावंतवाडीकडे जाणारी वाहतूक पूर्णतः थांबली होती. या वेळी शासनाकडून येत्या दोन दिवसांत काजू बी हमीभावाबाबत निर्णय न झाल्यास पुन्हा आंदोलन करण्याचा निर्णय घेण्यात आला. या आंदोलनात अध्यक्ष विलास सावंत, दिलीप मावळणकर यांच्यासह शेकडो काजू उत्पादक सहभागी झाले होते.

आता मुंबई-गोवा महामार्ग रोखणार

काजू बी दराबाबात शासनाने तातडीने निर्णय घ्यावा. आता दोडामार्गात रास्ता रोको आंदोलन केले. परंतु जर दोन-तीन दिवसांत निर्णय न झाल्यास तर मुंबई गोवा महामार्गावर रास्ता रोको आंदोलन करू, असा इशारा काजू उत्पादकांनी दिला आहे.