Nanded News : राष्ट्रीय कृषी आणि ग्रामीण विकास बँकेच्या (नाबार्ड) अर्थसहाय्यित एकात्मिक पाणलोट विकास व हवामान बदल अनुकूल कार्यक्रम अंतर्गत, काटकळंबा (ता. कंधार) येथील महिला बचत गटांच्या ४८ महिलांची परभणी येथील वसंतराव नाईक मराठवाडा कृषी विद्यापीठात गुरुवारी (ता. १९) एक दिवसीय अभ्यास सहल आयोजित करण्यात आली.

या उपक्रमाची अंमलबजावणी संस्कृती संवर्धन मंडळ, सगरोळी व जय शिवराय पाणलोट विकास संस्था यांच्या संयुक्त विद्यमाने करण्यात आली. सहलीसाठी नाबार्डचे नांदेड जिल्हा विकास व्यवस्थापक दिलीप दमय्यावार यांच्या मार्गदर्शनाखाली विद्यापीठातील गृहविज्ञान महाविद्यालय, कृषी यांत्रिकीकरण विभाग, अन्नप्रक्रिया प्रयोगशाळा आदी विभागांमध्ये महिला सदस्यांना महिला सक्षमीकरण, पोषण आहार, आरोग्य, शेती यांत्रिकीकरण, अन्न प्रक्रिया व लघुउद्योग संधी यावर तज्ज्ञांचे सखोल मार्गदर्शन मिळाले.

प्रमुख सत्रांमध्ये डॉ. जया बंगाळे, डॉ. अश्विनी भिडवे, डॉ. नीता गायकवाड, डॉ. जायभाये, डॉ. प्रमोदिनी मोरे आदींनी विचार मांडले. सहलीचे नियोजन गंगामणी अंबे व लक्ष्मण चव्हाण, रामदास बस्वदे यांनी केले. सगरोळी कृषी विज्ञान केंद्राच्या डॉ. माधुरी रेवणवार यांचे मार्गदर्शन तर जय शिवराय पाणलोट समिती व ग्रामपंचायतीचे सहकार्य लाभले. हा उपक्रम महिलांच्या शेतीविषयक ज्ञानात भर घालणारा, व्यवसायासाठी प्रेरणादायी आणि सक्षमीकरणाच्या दिशेने महत्त्वपूर्ण पाऊल ठरला आहे.