Sindhudurg News : हत्ती पकड मोहिमेबाबत वनविभागाच्या अधिकाऱ्यांनी हतबलता व्यक्त केल्यामुळे शेतकरी आक्रमक झाले. त्यांनी अधिकाऱ्यांवर तोडसुख घेत चांगलेच धारेवर धरले. या मोहिमेबाबत सदिंग्धता कायम असून हत्तीकडून नुकसानसत्र सुरूच आहे.

हत्तीपकड मोहीमेसंदर्भात गुरुवारी (ता.१२) दोडामार्ग वनविभागाच्या कार्यालयात मुख्य वनसंरक्षक एस. रामानुजम यांच्या उपस्थितीत बैठक झाली. स्वराज्य सरपंच सेवा संघटनेचे जिल्हाध्यक्ष प्रवीण गवस, बाबूराव धुरी, गणेशप्रसाद गवस, दिपक गवस यांच्यासह शेकडो शेतकरी उपस्थित होते.

बैठकीच्या सुरुवातीलाच हत्तीपकड मोहीमेबाबत गेल्या दोन महिन्यांत कोणती कार्यवाही वनविभागाने केली अशी विचारणा श्री.गवस यांनी केली. या वेळी मुख्य वनसंरक्षक श्री. रामानुजम यांनी कर्नाटक प्रशासन आपल्याकडे हत्ती घेण्यास नकार देत असून पकड मोहिमेसाठी सहकार्याची भुमिका दर्शवित नाही.

वनविभागाकडून सर्वतोपरी प्रयत्न सुरू आहेत. आता आम्ही हा प्रस्ताव पुन्हा वनमंत्र्यांकडे पाठविणार आहोत, अशी माहिती दिली. या खुलाशानंतर शेतकरी आक्रमक झाले. शेतकऱ्यांनी ज्यावेळी आंदोलन केले. त्यावेळी ७२ दिवसांत पकड मोहीम राबविण्यात येईल, असे आश्वासन दिले होते. दिलेल्या मुदतीला आता केवळ १५ दिवस शिल्लक आहेत.

हत्तीकडून कोट्यावधी रुपयांचे नुकसान केले जात आहे. त्यामुळे आता हे थांबविणे आवश्यक आहे. या वेळी श्री.रामानुजम यांनी या विषयासंदर्भात वनमंत्रीच तोडगा काढू शकतात. त्यांनी जर कर्नाटक वनमंत्र्यांशी चर्चा केली तर हा प्रश्न सुटू शकेल असे सांगितले.

त्यामुळे बैठकीत कोणताही ठोस कृतीबाबत निर्णय वनविभागाकडून जाहीर न केल्यामुळे शेतकऱ्यांनी नाराजी व्यक्त केली. शेतकऱ्यांनी पालकमंत्र्यांशी चर्चा करून वनमंत्र्यांशी चर्चा करण्याचे निश्चित केले आहे.