Nashik News : निफाड गहू संशोधन केंद्रावर रविवारी (ता. १४) १२.२ अंश सेल्सिअस नोंदविण्यात आले होते. तर दुसऱ्या दिवशी सोमवारी (ता.१५) तापमान १२.२ अंश सेल्सिअस एवढे होते. पारा निम्म्यावर घसरल्याने परिसरातील काढणीसाठी आलेल्या द्राक्ष बागांमध्ये अडचणी निर्माण झाल्या होत्या.

सप्ताहात तापमानात चढ-उतार दिसून आले. मात्र गारठा वाढल्याने शेतकरी धास्तावले असून द्राक्ष बागा वाचविण्यासाठी प्रयत्न सुरू आहेत. सकाळी ठिबकद्वारे पाणी, तर शेकोटी पेटवण्यास सुरुवात झाली आहे.

जिल्ह्यात सप्टेंबर महिन्याच्या अखेरीस छाटलेल्या द्राक्ष बागांमध्ये काढणीस सुरुवात झाली आहे. अनेक ठिकाणी मण्यात साखर उतरण्याची अवस्था आहेत, तर काही बागेत खुडे सुरू झाले आहेत. मात्र थंडीचा प्रकोप वाढल्याने आता साखर उतरण्यात अडचण येत असून खुडे लांबणीवर जात आहेत.

काही ठिकाणी द्राक्ष मण्यांना केसासारखे बारीक तडे जाण्याची समस्या दिसून आली आहे. गेल्या वर्षीच्या डिसेंबर ते यंदाच्या जानेवारी महिन्याच्या दुसऱ्या सप्ताहापर्यंत थंडीचा कडाका कमी होता.

मात्र आता पारा घसरल्याने काही ठिकाणी द्राक्षमण्यांना तडे जाण्याची भीती आहे.
कडाकाच्या थंडीपासून द्राक्षबागा वाचविण्याससाठी पहाटे ठिबकद्वारे सिंचन व शेकोटी पेटवून धूर करून ऊब देण्यासारखे उपाय शेतकऱ्यांना करावे लागत आहेत.