E-Peek Pahani Parbhani : यंदाच्या (२०२२-२३) रब्बी हंगामात परभणी जिल्ह्यात २ लाख ९५ हजार ४६२ हेक्टरवर पेरणी (Rabi Sowing) झाली आहे. तर गुरुवार (ता. १६) पर्यंत १ लाख २० हजार ३१ खातेदार शेतकऱ्यांनी १ लाख ८९ हजार ३५० हेक्टर क्षेत्राची ई-पीकपाहणी (E-Peek Pahani) केली आहे

यंदाचे ई-पीकपाहणी क्षेत्र रब्बीतील (Rabbi Season) अंतिम पेरणी क्षेत्रानुसार ६४.०८ टक्के आहे. यंदा एकूण खातेदार शेतकऱ्यांपैकी २४.०७ टक्के शेतकऱ्यांनी ई-पीकपाहणी केली. गतवर्षीच्या तुलनेत ई-पीकपाहणी क्षेत्रात यंदा १ लाख ३७ हजार ४३९ हेक्टरने वाढ झाली.

यंदाच्या (२०२२-२३) रब्बीतील १०० टक्के पेरणी क्षेत्राची ई-पीकपाहणी करण्याची प्रक्रिया गतिमान व्हावी यासाठी जिल्हा प्रशासनाने तीन दिवस विशेष मोहीम राबविली. त्यानंतर ई-पीकपाहणी वाढ झाली आहे.

रब्बी पीक पाहणीसाठी बुधवार (ता. १५) पर्यंत अंतिम मुदत होती. परंतु ई-पीकपाहणी बाबत असंख्य शेतकऱ्यांना माहिती नसणे, इंटरनेट कनेक्टिव्हिटीचा अभाव, सर्व्हर डाउनची समस्या, तलाठ्यांची उदासीनता त्यामुळे रब्बीतील संपूर्ण पेरणी क्षेत्राची ई-पीकपाहणी झालेली दिसत नाही.

जिल्ह्यात शेती खातेदारांची संख्या ५ लाख ४८ हजार ५११ हेक्टर असून एकूण क्षेत्र ६ लाख ७ हजार ७११ हेक्टर आहे. यंदा ई-पीक अॅपद्वारे पीकपाहणीचे क्षेत्र १ लाख ८९ हजार ३५० हेक्टर आहे. चालू पड १ हजार ९० हेक्टर आहे.

पेरणी क्षेत्र आणि पड क्षेत्र मिळून १ लाख ९० हजार ४४१ हेक्टर क्षेत्र आहे. गतवर्षीच्या (२०२१-२२) रब्बीत परभणी जिल्ह्यातील २ लाख ७१ हजार १४२ हेक्टर पेरणी क्षेत्रापैकी ५१ हजार ९११.५२ हेक्टर (१९.१५ टक्के) क्षेत्राची ई-पीकपाहणी झाली होती.

ई-पीकपाहणीचे महत्त्व....

ई-पीकपाहणी नोंदणी खातेदार शेतकऱ्यांनी मोबाईल अॅपद्वारे स्वतः केली असल्यामुळे, स्वयंप्रमाणित मानली जाते. किमान आधारभूत किंमत खरेदी योजनेंतर्गत नाफेडमार्फत शेतीमाल खरेदी-विक्री ई-पीक नोंदणीसाठी आवश्यक आहे.

याद्वारे शेतातील जल सिंचनाच्या स्रोताची नोंद ७/१२ वर केली जाते. त्यामुळे शेतकऱ्यांना सौर कृषिपंप योजनेत अर्ज करणे सुलभ होते. बांधावरील झाडांची नोंद करण्याचीही सुविधा या ई-पीकपाहणी अॅपमध्ये उपलब्ध आहे.

रब्बी पेरणी, ई-पीकपाहणी क्षेत्र (हेक्टरमध्ये) गुरुवार ता. १६ पर्यंत

तालुका - पेरणी क्षेत्र - ई-पीकपाहणी क्षेत्र - शेतकरी संख्या

परभणी- ५६६४० २८५७४ १८०८७

जिंतूर- ६०००१ ३९७०५ २५६१०

सेलू - ३३३०८ २१०४१ १४१५४

मानवत- २००६९ १५४३६ १०१४६

पाथरी - १८२४८ १२३८३ ८३४७

सोनपेठ - १५८६४ १२९९१ ९०३९

गंगाखेड - ३२६५८ २०३५६ १४९५८

पालम - २१३७६ १४३३२ ११८६०

पूर्णा - ३७२९७ २४५२८ १९८३०