Pune News : दिवाळीच्या काळात पुणे विभागातून मोठ्या प्रमाणात एसटी बस सोडण्यात आल्या होत्या. नियमित सोडलेल्या आणि जादा बसमधून तब्बल पंधरा लाख प्रवाशांनी प्रवास केला. त्यामधून पुणे विभागाला जवळपास १८ कोटी रुपयांचे उत्पन्न मिळाले.

दरम्यान, भाऊबीजेच्या दिवशी म्हणजेच ३ नोव्हेंबर रोजी विभागातून तब्बल एक लाख ५१ हजार प्रवाशांनी प्रवास केला. त्यातून एसटीला दोन कोटी १० हजारांचे उत्पन्न मिळाले. दिवाळीच्या दहा दिवसांतील ही सर्वाधिक प्रवासी संख्या ठरली.

गेल्या काही महिन्यांपासून एसटीला प्रवाशांची पसंती वाढली आहे. पुणे एसटी विभागाकडून दिवाळीत नियमित आणि खडकी येथील मैदानातून जादा बस सोडण्यात आल्या. यंदा ५५० जादा बस सोडण्याचे नियोजन केले होते. विभागातील १३ आगारांतून ८८० जादा बस सोडल्या होत्या.

एसटी महामंडळाच्या महिला सन्मान योजना आणि अमृत ज्येष्ठ नागरिक योजनांमुळे एसटीकडे प्रवासी मोठ्या संख्येने वळले आहेत. अजूनही पुढील आठ दिवस ही गर्दी कायम राहणार आहे.

एसटी महामंडळाकडून दरवर्षी दिवाळीत १० टक्के भाडेवाढ करण्यात येते. यंदा राज्य सरकारने ही भाडेवाढ रद्द केली. यामुळे सामान्य प्रवाशांना दिलासा मिळाला असला, तरी एसटीच्या पुणे विभागात उत्पन्नात सुमारे आठ टक्के घट झाली आहे, अशी माहिती पुणे प्रादेशिक परिवहन महामंडळाच्या सूत्रांनी दिली.