Tuljapur News : तुळजापूर तालुक्यातील अनेक भागात पावसाने दीर्घकालीन उघडीप दिली आहे. त्यामुळे सोयाबीन, उडीद यासह इतर विविध पिके सध्या कोमजत असून माना टाकू लागली आहेत. त्यामुळे आता तुळजापूर तालुक्याला चांगल्या पावसाची प्रतिक्षा आहे.

यंदा तालुक्यात वेळेवर पेरण्या झाल्या आहेत. सध्या अनेक शेतकऱ्यांचे सोयाबीन तसेच उडीद पिके फुलांमध्ये अथवा शेंगामध्ये आहेत. उडीद पिकाचे आयुष्यच केवळ साडेतीन महिने असते. पेरणीपासून ते काढणीपर्यंत उडीद पिक साडेतीन महिन्यांमध्ये निघते. तथापी सध्या पाऊस नसल्यामुळे पिकांची चांगली वाढ होत नसल्याचे शेतकरी सांगत आहेत.

साधारणपणे तालुक्यात ८७ हजार हेक्टरमध्ये सोयाबीनचे क्षेत्र आहे. साडेतीन हजार हेक्टर क्षेत्रात उडीद आहे. शेतकऱ्यांच्या पिकाची सध्या वाढ होत नसल्यामुळे अडचणीचे दिवस आहेत. काही शेतकरी यापूर्वी झालेला पाऊस चांगल्या प्रकारे झाला होता.

मात्र, त्यानंतर पावसाने दिलेली उघडीप यामुळे शेतकऱ्यांची खरीपाची पिके अडचणीत आली आहेत. सध्या दुपारी बारा ते तीन या कालावधीत पिके सुकत आहेत. शेतकऱ्यांना सर्वच ठिकाणी सोयाबीन पिकला पाणी देण्यासारखी परिस्थिती नाही. ग्रामीण भागात शेतकरी अडचणीत सापडण्याची शक्यता आहे.