Nanded Sand Update : महाराष्ट्र दिनापासून सहाशे रुपये ब्रास वाळू विक्रीचा निर्णय राज्य सरकारने घेतला आहे. त्यानुसार जिल्हा आणि तालुका समित्या स्थापन करण्यात येत आहेत. त्यामुळे नागरिकांनी वाळू माफियांकडून वाळू घेऊ नये.

शासकीय डेपोतून सहाशे रुपये दराने वाळू मिळणार असल्याने नागरिकांनी शासकीय डेपोतून वाळू घ्यावी, असे आवाहन जिल्हाधिकारी अभिजीत राऊत (Collector Abhijit Raut) यांनी केले आहे.

राज्य शासनाने स्वतः वाळू डेपो सुरू करून वाळू विक्री करण्याचा निर्णय घेतला आहे. त्यामुळे सर्वसामान्य नागरिकांना केवळ सहाशे रुपये ब्रास या दराने वाळू मिळणार आहे. जिल्ह्यात या वर्षी एकाही वाळू घाटाचे लिलाव झाले नाहीत.

सध्या बाजारात वाळूचे दर तीन ते चार हजार रुपये ब्रास आहेत. त्याचबरोबर प्लॅटरसाठीची लाल पिवळी वाळू ही चार ते पाच हजार रुपये ब्रास आहे. त्यामुळे वाळू सहाशे रुपये ब्रास मिळाली तर सर्वसामान्य नागरिकांचे पैसे वाचणार आहेत. त्यामुळे जिल्हा प्रशासनाने लवकरात लवकर वाळू विक्रीसाठी डेपो सुरू करावेत, अशी मागणी अनेक नागरिकांनी केली आहे.