Nanded News: मालेगाव (ता. अर्धापूर) येथील शेतकरी मित्र फार्मर प्रोड्यूसर कंपनीकडून परिसरातील ६५ सभासद शेतकऱ्यांना शासनाच्या अनुदानित योजनेतील सोयाबीन बियाणे बॅग व द्रवरूप जिवाणू खतांचे वाटप करण्यात आले.

या वेळी नांदेड दक्षिण विधानसभा मतदार संघाचे आमदार आनंद तिडके बोंढारकर, शासकीय कृषी महाविद्यालयाचे प्राचार्य डॉ. नरेश जायेवार, अर्धापूर तालुका कृषी अधिकारी विशाल बिऱ्हाडे, ब्रह्माकुमार दत्ताभाई कदम, ब्रह्माकुमारी स्वाती बहेनजी, अनिता बहनजी,

‘के फर्ट लॅब’चे भानुदास पेंडकर, एकनाथ पाटील, वसमत हळद संशोधन केंद्राचे प्रमुख रमेश देशमुख, कंपनीचे संचालक प्रल्हाद इंगोले, कृषिभूषण भगवान इंगोले आदी उपस्थित होते. पेरणीपूर्व नैसर्गिक शेती मार्गदर्शन मेळावा व अन्न सुरक्षा अभियानाअंतर्गत शेतकऱ्यांना मोफत सोयाबीन बियाण्याचे वाटप कृषी विभाग, कृषी विज्ञान केंद्र पोखर्णी व शेतकरी मित्र फार्मर प्रोड्यूसर कंपनी मालेगाव यांच्या संयुक्त विद्यमाने मालेगाव येथे करण्यात आले.

कंपनीच्या महिला, अपंग, आत्महत्याग्रस्त शेतकरी कुटुंबातील गरजू सभासद शेतकऱ्यांसह ६५ शेतकऱ्यांना सोयाबीन बियाणे बॅग व द्रवरूप जिवाणू खत देण्यात आले. या वेळी मान्यवरांच्या हस्ते वृक्षारोपण करण्यात आले. याप्रसंगी पेरणीपूर्व मशागत बीजप्रक्रिया व अन्य बाबींची माहिती शेतकऱ्यांना दिली.

कंपनीच्या सभासद शेतकऱ्यांना शासनाच्या योजनांचा लाभ मिळवून देण्यासाठी प्रयत्नशील असून भविष्यात शेतीमालाचे मूल्यसाखळी उभी करून शेतीमालाला योग्य भाव मिळवण्यासाठी प्रयत्न राहील, असे प्रल्हाद इंगोले यांनी सांगितले.