Kolhapur News: वारणा सहकारी दूध संघाने दूध उत्पादकांच्या जनावरांसाठी ‘मस्टायटीस’ (स्तनदाह)  सारख्या असाध्य रोगावर प्रतिबंध करणाऱ्या तंत्रज्ञानाचे संशोधन करून ‘स्तनदाह प्रतिबंधक पशू खाद्याची’ निर्मिती केली आहे. अशा प्रकारचे पशुखाद्य तयार करणारा वारणा दूध संघ देशातील एकमेव असल्याची माहिती आमदार डॉ. विनय कोरे यांनी दिली. 

येथील वारणा सहकारी दूध उत्पादक संघाचा ५७ व्या वर्धापनदिनानिमित्त मस्टायटीस प्रतिबंधक पशूखाद्य व हिपर कॅटल फिड विक्रीचा प्रारंभ आणि संघाच्या पुणे येथील नूतन शाखेचे ऑनलाइन उद्‌घाटन उपाध्यक्ष एच. आर. जाधव यांच्यासह संचालक मंडळाच्या हस्ते झाले. या वेळी डॉ. कोरे बोलत होते.

कार्यकारी संचालक सुधीर कामेरीकर यांनी प्रास्ताविक केले. उपाध्यक्ष एच. आर. जाधव, ज्येष्ठ संचालक शिवाजीराव मोरे, पशुखाद्य व्यवस्थापक डॉ. जे. बी. कुलकर्णी, पशुवैद्यकीय व्यवस्थापक डॉ. जे. बी. पाटील यांची भाषणे झाली.

दत्त दूध संस्था बहिरेवाडी, गणेश दूध संस्था ऐतवडे खुर्द, वागजाई दूध संस्था धबधबेवाडी, कर्मवीर दूध संस्था ऐतवडे बुद्रूक, विलासराव कोरे दूध संस्था डोंगरवाडी या संस्थांना मस्टायटीस पशू खाद्याच्या विक्रीचा प्रारंभ झाला. या वेळी वारणा बॅंकेचे संचालक प्रमोद कोरे, दूध साखर वाहतूक संस्थेचे अध्यक्ष किशोर पाटील आदींसह संचालक उपस्थित होते. व्ही. टी. पाटील यांनी आभार मानले.