Nashik News: येथील कृषी उत्पन्न बाजार समितीत सभापती चंद्रकांत शेवाळे आणि फळ व भाजीपाला व्यापाऱ्यांमध्ये बैठकीत वाद झाला. सभापती शेवाळे यांनी दमबाजी करत शिवीगाळ केल्याचा आरोप व्यापाऱ्यांनी केला आहे. सभापतींच्या वक्तव्याचा निषेध करण्यात आला. सभापतींनी पदाचा राजीनामा द्यावा.

तसेच ते जोपर्यंत माफी मागत नाहीत तोपर्यंत बाजार बेमुदत बंद ठेवण्याचा निर्णय फळ व भाजीपाला असोसिएशनने घेतल्याची माहिती अध्यक्ष किशोर सोनवणे यांनी दिली. दरम्यान, सभापती शेवाळे यांनी व्यापाऱ्यांचे आरोप फेटाळून लावले आहेत.बाजार समितीत सोमवारी (ता. ३०) सभापती शेवाळे यांनी फळ व भाजीपाला बाजारातील व्यापाऱ्यांची बैठक बोलावली होती.

असोसिएशनचे अध्यक्ष किशोर सोनवणे, नथू वाघ, दिलीप अभोणकर, देवीदास वाघ, फकिरा हाजी, निहालभाई यांच्यासह बहुसंख्य व्यापारी उपस्थित होते. बैठकीत सभापतींनी येणाऱ्या मालाची नोंद ठेवण्यासाठी व्यापाऱ्यांना बाजार समितीचे बुक द्यायचे आहे,असे सांगितले. यावर काही व्यापाऱ्यांनी असा कायदा नसल्याचे सांगितल्याने वादाची ठिणगी पडली.

काही वेळानंतर व्यापारी बैठकीतून निघून गेले. या संदर्भात असोसिएशनचे अध्यक्ष सोनवणे यांनी पत्रकारांना माहिती दिली. सभापतींनी चिडून व्यापाऱ्यांना शिवीगाळ केली. धमकी, दमबाजी करत अर्वाच्य भाषा वापरली. त्यामुळे संतप्त व्यापाऱ्यांनी मंगळवार (ता. १) पासून बेमुदत बंद ठेवण्याचा निर्णय घेतला आहे.