Solapur News : सोलापुर जिल्ह्याची वरदायिनी असणाऱ्या उजनी धरणाच्या वरच्या बाजूकडील धरणक्षेत्रात जोरदार पाऊस सुरू झाल्याने या धरणातील अतिरिक्त पाण्याचा विसर्ग उजनी धरणाकडे सोडण्यात येत आहे.

गुरुवारी (ता. २५) पहाटे ४३ हजार क्युसेकने विसर्ग सोडण्यात येत होता. तर दुपारी ६७ हजार क्युसेकपर्यंत तो वाढवण्यात आला. त्यामुळे धरणाची पाणीपातळी झपाट्याने वाढत असून, उणे पातळीमध्ये गेलेले धरण येत्या दोन दिवसांत अधिकपातळीत येण्याची शक्यता आहे.

पुणे जिल्ह्यात गेल्या दोन-तीन दिवसांपासून पावसाचा जोर वाढला आहे. विशेषतः धरणक्षेत्रात पावसाचा वेग मोठा आहे. उजनी धरणाच्या वरच्या बाजूला जवळपास छोटी-मोठी १८ धरणे आहेत.

या धरणात पाण्याची पातळी बऱ्यापैकी वाढली आहे. त्यामुळे हे पाणी आता पुढे उजनीकडे सोडण्यात येत आहे.

गुरुवारी (ता. १८) बंडगार्डन, लोणावळा, भीमाशंकर आदी परिसरातील धरणांतून साधारण ६७ हजार क्युसेकचा विसर्ग एकत्रित दौंडमधून उजनीकडे येत होता. उजनी धरण सध्या उणे १२ टक्क्यांवर आहे. पाण्याचा हा विसर्ग असाच राहिला किंवा आणखी वाढवल्यास येत्या दोन दिवसांत धरण उणेतून अधिक पातळीत येण्याची शक्यता आहे.