Solapur News : सध्या दुष्काळी परिस्थितीमुळे पाण्याची पातळी मोठ्या प्रमाणावर घटली आहे, अशा परिस्थितीत पाण्यासाठी विहिरी, बोअर घेण्याचे प्रमाण वाढले आहे. करमाळा तालुक्यात शेतकऱ्यांकडून अनेक भागांत वहिरी खोदण्याची कामे सुरू आहेत. अलीकडे पोकलेनने विहिरी खोदण्याचे काम वेगाने होते. त्यामुळे विहिरींची खोदाईही वाढली आहे.

करमाळा तालुक्यात मोठ्या प्रमाणावर विहिरी खोदल्या जात आहेत. उजनी धरणाची पाणी पातळी उणे ४१ टक्क्यांपर्यंत गेली आहे. या परिस्थितीत पाण्यासाठी उजनी परिसरात देखील मोठ्या प्रमाणावर विहिरी खोदल्या जात आहेत. काही विहिरी पोकलेनने खोदल्या जात आहेत. मात्र काही विहिरी क्रेनने खोदण्यात येत आहेत.

५० फुटांपर्यंत पोकलेन विहीर खोदण्याची सोय आहे, मात्र ५० फुटांपेक्षा जास्त खोल विहीर खोदायचे असल्यास क्रेन शिवाय दुसरा पर्याय नाही. त्यामुळे पाणीपातळी घटल्याने पन्नास फुटांपेक्षा देखील खोल विहिरी खोदण्याचे प्रमाण वाढले आहे. त्यामुळे पोकलेनसह क्रेन व्यवसायिकांच्या व्यवसायानेही जोर धरला आहे.

विशेषत: रोजगार हमी योजनेतील मंजूर विहिरींचाही यात समावेश आहे. सध्या तालुक्यात क्रेनच्या साह्याने ५० फूट खोल व २५ फूट रुंद विहीर खोदण्यासाठी साधारणपणे साडेचार ते पाच लाख रुपये घेतले जात आहेत.

एका क्रेनवर क्रेन चालवण्यासाठी एक प्रिंट करण्यासाठी एक व क्रेनमधून आलेली पाटी खाली करण्यासाठी एक आणि विहिरीमध्ये काम करण्यासाठी साधारणपणे आठ ते नऊ असे सर्वसाधारण दहा ते बारा मजुरांना काम मिळते आहे. त्यासाठी या मजुरांना ५७५ रुपये रोजगार मिळतो. तर क्रेनचे भाडे आठशे रुपयांपासून हजार रुपयांपर्यंत घेतले जाते. किती विहिरींना पाणी लागणार, किती टिकणार, हा भाग वेगळा असला, तरी केवळ पाण्याच्या आशेने विहिरी घेणाऱ्यांची संख्या मात्र वाढली आहे.