Solapur News : सोलापूर जिल्ह्यासह राज्यात भूमिअभिलेख सर्व्हरमधील तांत्रिक बिघाडामुळे गेल्या दोन दिवसांपासून सातबारा उतारे देणे बंद आहे. परिणामी, सातबारा उतारे मागणीसाठी सीएससी सेंटर्स, महा ई-सेवा केंद्रावर शेतकऱ्यांना मात्र हेलपाटे मारण्याची वेळ आली आहे.

सर्व्हरमध्ये यापूर्वीही सातत्याने असा बिघाड झालेला आहे, त्यामुळे सततच्या या प्रकाराने शेतकऱ्यांना मात्र मनस्ताप होत आहे. शेतकऱ्यांना विविध संस्था, बँकांकडून घेतलेले कर्ज नूतनीकरण करण्यासह वारस नोंद, शेती वाटपाची नोंद, शेतकऱ्यांच्या विविध योजना, शेतीमोजणी, शेती खरेदी-विक्री आदी विविध कामासाठी डिजिटल सात-बाराची गरज भासते.

त्यातच जिल्ह्यातील सर्व सेतू केंद्रेही बंद आहेत. त्यामुळे शेतकऱ्यांना सीएससी सेंटर्स आणि महा ई-सेवा केंद्रांचा पर्याय आहे. पण सर्व्हर डाउनमुळे तिथूनही उतारे मिळत नसल्याने हेलपाटे मारण्याशिवाय शेतकऱ्यांकडे काहीच राहिलेले नाही.

काही ठिकाणी तलाठ्यांकडे ऑफलाइन उतारे मिळवण्यासाठी प्रयत्न केला जातो आहे. पण गावपातळीवरील हे भाऊसाहेबही अनेक वेळा जागेवर नसतात किंवा असतील तर तेही काही तरी तांत्रिक अडचणी सांगून टाळतात, त्यामुळे दोन्ही बाजूंनी शेतकऱ्यांची कोंडी होत आहे.