Akola News : महिनोन् महिने दरवाढीची अपेक्षा ठेवून घरात साठवून ठेवलेला कापूस आता शेतकरी हंगामाच्या तोंडावर विक्रीला काढू लागले आहेत. दरतर वाढले नाहीतच शिवाय कापूस घरात साठवण्यामुळे अडचणी मात्र तयार झाल्या. परिणामी, आता अनेकांनी कापूस विक्रीला सुरुवात केली आहे.

पश्‍चिम विदर्भात अकोला, बुलडाणा, वाशीम व इतरही जिल्ह्यांत खरिपात सोयाबीननंतर कपाशी हेच दुसरे मुख्य पीक आहे. या वर्षात विविध संकटांना तोंड देत कापूस हंगाम आटोपला. काही शेतकऱ्यांना सरासरी एकरी सहा क्विंटलपासून, तर १० क्विंटलपर्यंत उतारा लागलेला आहे.

चांगले व्यवस्थापन करणाऱ्यांचा उतारा याहीपेक्षा अधिक आहे. या वर्षात १० हजारांवर कापसाला दर मिळेल याची हंगामाच्या सुरुवातीपासूनच अपेक्षा लागलेली होती. परिणामी बऱ्याच शेतकऱ्यांनी पहिल्या-दुसऱ्या वेचणीपासूनचा कापूस साठवून ठेवण्यास प्राधान्य दिले.

हंगामाच्या सुरुवातीला साडेआठ ते नऊ हजारांचा दर निघाला होता. वेचणीच्या काळात पाऊस झाल्याने कापसात ओलसरपणा वाढला. परिणामी, हा कापूस साडेसहा हजारांपर्यंत दराने खरेदी झाला. नंतर चांगल्या कापसाचा दर सात ते आठ हजारांदरम्यान फिरत होता.

फारच थोड्या लोकांना आठ हजारांवर दर मिळाल्याची वस्तुस्थिती आहे. यंदाच्या खरीप हंगामाला लवकरच सुरुवात होत असून, अनेकांच्या घरात कापूस तसाच पडून आहे. दरवाढीच्या दृष्टीने साठवलेला कापूस आता अवघा सात ते साडेसात हजारांदरम्यान विकत आहे.

पुढील काळात दरवाढीचे संकेत नसल्याने घरात पडून असलेला कापूस आता विक्री होऊ लागला. खेडा खरेदीत सध्या साडेसात हजारांच्या आतच व्यापारी हा कापूस खरेदी करीत आहेत. अद्यापही ३० टक्के कापूस उत्पादकांच्या घरात कापूस पडून असण्याची शक्यता वर्तविली जात आहे. काही शेतकऱ्यांकडे तर मागील हंगामाचाही कापूस अद्याप आहे. दरवाढ होत नसल्याने साठवणूक करणारे शेतकरी विवंचनेत सापडले आहेत.