Pune News : राज्यात विधानसभा निवडणुकीच्या रणधुमाळीला सुरूवात झाली असून विविध मतदार संघात प्रचार सुरू झाला आहे. तर सोमवारी (ता. ४) अर्ज मागे घेण्याचा अखेरचा दिवस आहे. यादरम्यान राज्यात अनेक ठिकाणी लक्ष्यवेधी लढत होणार असून बारामतीत काका विरोधात पुतण्या अशी लढत होणार आहे. येथे अजित पवार आणि युगेंद्र पवार यांच्या थेट लढत होणार आहे. यादरम्यान अजित पवार यांनी बारामतीच्या पाण्यावरून भाष्य करताना, बारामतीच्या पाण्यासाठी नियम पाळला नाही, असे म्हटले आहे. त्यांच्या या वक्तव्याची आता बारामतीसह जिल्ह्यात चर्चा होत आहे.

बारामतीत युगेंद्र पवार यांच्यासह अजित पवार प्रचाराला लागले आहेत. युगेंद्र पवार यांच्याबरोबर जेष्ठ नेते शरद पवार, खासदार सुप्रिया सुळे प्रचाराच्या मैदानात उतरले आहेत. तर अजित पवार यांच्यासाठी खासदार सुनेत्रा पवार, पार्थ पवार यांच्यासह जिल्ह्यातील राष्ट्रवादीचे नेते प्रचार करत आहेत. दरम्यान दिवाळी पाडव्या दिवशी अजित पवार यांनी तालुक्यातील कटफळ येथे प्रचार दौरा केला. यावेळी त्यांनी ग्रामस्थांशी चर्चा केली. यावेळी अजित पवार यांनी, आपण पाण्यासाठी नियम डावलले आणि बारामतीकरांना पाणी दिल्याचे म्हटलं आहे.

बारामती तालुक्यातील अनेक गावांमध्ये पाण्याचा प्रश्न गंभीर असून गावकऱ्यांना पाण्यासाठी भटकंती करावी लागते. मात्र पाण्यासाठी लोकांना भटकंती करावी लागू नये यासाठी नियमात बसत नसतानाही पाणी दिलं. पाणी सोडण्यासाठी अधिकाऱ्यांना भाग पाडलं, असे अजित पवार यांनी म्हटले आहे. असे करण्यासाठी नेतृत्वात धमक असावी लागते.

बारामतीकरांच्या पाण्यासाठी अधिकाऱ्यांना, मला माझ्या लोकांसाठी पाणी हवं आहे. माझ्या लोकांचे नुकसान होत असल्याचे सांगितले होते. तर अधिकाऱ्यांना पाणी सोडण्यास भाग पाडले. मी असं काम करतो, असे अजित पवार यांनी म्हटले. यावेळी लोकसभेला जर सुप्रिया पडली असती तर साहेबांना 'या' वयात त्रास झाला असता. यामुळे तुम्ही सुप्रियाला मतदान केले. आता विधानसभेला मला मतदान करा, मला पण खुश करा. साहेब त्यांच्या पद्धतीने काम करतील. मी माझ्या पद्धतीने मतदारसंघाचा विकास करतो, असे आवाहनही अजित पवार यांनी केले आहे.