Washim News : यंदा जिल्ह्याची पैसेवारी ४८ पैसे काढली असल्याने शासनाने मानोरा तालुका दुष्काळग्रस्त जाहीर करून शेतकऱ्यांना लाभ द्यावा, अन्यथा शेतकऱ्यांसह काँग्रेस पक्ष आंदोलन करेल असा इशारा महाराष्ट्र काँग्रेस प्रदेशचे संघटन सचिव देवानंद पवार यांनी दिला. सोमवारी (ता. १ जानेवारी) त्यांनी पत्रकारांसोबत संवाद साधला.

ते म्हणाले, ‘‘मानोरा तालुका डोंगराळ व अतिदुर्गम भागात मोडतो. संत सेवालाल महाराज यांचे पदस्पर्शाने पुनीत तालुका असताना मोठ्या प्रमाणात हा तालुका दुर्लक्षित ठेवण्यात राजकीय पुढाऱ्यांचा नाकर्तेपणा आहे. या तालुक्यात रोजगाराच्या सोयीसुविधा नसल्याने मोठ्या प्रमाणात मजुराचे स्थलांतर होत असते.

तालुक्यात एमआयडीसी आहे. मात्र उद्योग उभारल्या गेलेले नाहीत. येथे आरोग्य, शिक्षण सुविधांची वाणवा असून राजकीय लोक धार्मिकतेकडे नेत आहेत. येथील नागरिकांचे दरडोई उत्पन्न सुद्धा कमी आहे.

३१ डिसेंबरला महसूल विभागाकडून मानोरा तालुक्याची अंतिम पैसेवारी ४८ पैसे काढल्याने शासनाने तत्काळ आदेश काढून येथील शेतकऱ्यांना आवश्यक सुविधा देण्यात याव्या. मानोरा तालुक्यात जंगली प्राण्यांचा उपद्रव मोठ्या प्रमाणात आहे. पंजाब

सरकारच्या धर्तीवर जंगली डुकर मारण्याची परवानगी द्यावी व जंगली प्राण्यांपासून शेतीपिकाला नुकसान भरपाई देण्यात यावी,’’ अशी मागणीही पवार यांनी केली. या वेळी ईफतेखार पटेल, साहेबराव पवार, गजानन राठोड, महेश जाधव, डॉ. अशोक करसडे, बरखा बेग, रामनाथ राठोड, हाफिज खान आदी पदाधिकारी उपस्थित होते.