Daund News : मागील वर्षी शेतकऱ्यांना गर्वी कांद्याला वर्षभर चांगला बाजारभाव मिळाला. या वर्षीदेखील कांद्याला चांगला दर मिळेल या आशेने शेतकऱ्यांनी कांदा लागवडीस पसंती दिली आहे.

परिणामी यंदा लागवडीच्या क्षेत्रात मोठी वाढ झाली आहे. दौंड तालुक्यात ६० ते ७० टक्के कांद्याच्या लागवडी पूर्ण झाल्या आहेत. दौंड तालुका हा उसाचा आगर म्हणून ओळखला जातो. परंतु सातत्याने शेतामध्ये उसाचे पीक घेतल्याने उत्पादनात मोठी घट झाल्याचे दिसत आहे. यामुळे शेतकऱ्यांनी शेतामध्ये मिश्र पीक घेऊन पीक पद्धतीमध्ये बदल केला आहे.

मागील वर्षी कांद्याला २० रुपयांपासून ८० रुपयांपर्यंत बाजारभाव मिळाला. यामुळे शेतकऱ्यांना एकरी किमान ४ ते ६ लाख रुपये मिळाले. तर काही शेतकऱ्यांना नोव्हेंबरमध्ये ६० ते ८० रुपयांपर्यंत प्रतिकिलोला बाजारभाव मिळाला. मागील वर्षी कांद्याला चांगला दर मिळाल्याने शेतकऱ्यांनी कांद्याच्या लागवडीमध्ये वाढ केली आहे.

जानेवारीअखेरपर्यंत कांदा लागवड सुरू राहणार आहे. परंतु चालूवर्षी लागवडीच्या मजुरीमध्ये वाढ झाली आहे. मजुरीत वाढ झाल्याने काहींनी ट्रॅक्टर यंत्राच्या साह्याने लागवड केली आहे. बदलत्या वातावरणामुळे लागवड केलेल्या कांद्यावर मुळकूज, पीळ, मावा अशा रोगांचा प्रार्दुभाव झाला आहे. यामुळे शेतकऱ्यांमध्ये चिंता व्यक्त होत आहे. मुळकूजमुळे काही शेतकऱ्यांना कांद्याची दुबार लागवड करावी लागत आहे. यामुळे आर्थिक फटका बसण्याची शक्यता नाकारता येत नाही.