Sindhudurg News : जिल्ह्यात दोन दिवस झालेली अतिवृष्टी आणि काही भागात झालेला ढगफुटीसदृश्य पाऊस यामुळे जिल्ह्यातील ३५ गावांतील १६५ शेतकऱ्यांचे ८० हेक्टरवरील पिकांचे नुकसान झाले आहे. सर्वाधिक नुकसान भातपिकांचे झाले असुन यामध्ये वाढ देखील होण्याची शक्यता आहे.

जिल्ह्यात २२ सप्टेंबर आणि २३ सप्टेंबरला मुसळधार पाऊस झाला. काही भागात ढगफुटीसदृश्य पाऊस झाला. नदीनाल्यांना पुरस्थिती निर्माण झाली होती. नदीमधील दगडमाती नदीकाठच्या पिकांमध्ये वाहुन गेल्याचे चित्र अनेक गावांमध्ये होते.

तर काही ठिकाणी भातपीक जमीनीवर आडवी झाली आहेत. तर काही भागात फळपिकांना देखील अतिवृष्टीचा फटका बसला आहे. कृषी विभागाकडुन आता नुकसानीच्या पंचनाम्याना सुरूवात करण्यात आली आहे.

आतापर्यंत अतिवृष्टीने ३५ गावातील १६५ शेतकऱ्यांच्या ७९.९० हेक्टर क्षेत्रावरील नुकसान झाल्याचे स्पष्ट झाले आहे. यामध्ये सर्वाधिक क्षेत्र भातपिकाचे आहे. या नुकसानीच्या आकडेवारीत आणखी वाढ होण्याची शक्यता आहे.

वैभववाडी, कणकवली, कुडाळ, सावंतवाडी, मालवण, सावंतवाडी आणि दोडामार्गात अधिकत्तर नुकसान झाले असुन वेंगुर्ले आणि देवगड तालुक्यात नुकसान झाल्याची नोंद अद्याप झालेली नाही.

 सिंधुदुर्गात पावसाच्या हलक्या ते मध्यम सरी

जिल्ह्यात पावसाचा जोर काहीसा कमी झाला आहे. काही भागात हलक्या तर काही भागात मध्यम स्वरूपाच्या सरी पडत असल्याचे चित्र आहे. दुपारनतंर काही भागात उघडीप देखील दिली होती.