Crop Damage : अतिवृष्टीमुळे ८४ हेक्टरवर पिकांचे नुकसान

Nashik News : जिल्ह्यात गेल्या पाच दिवसांपासून सुरू असलेल्या जोरदार पावसामुळे जिल्ह्याच्या विविध भागांत खरिपातील कापणीस आलेल्या पिकांची दाणादाण उडाली आहे. त्यामध्ये नांदगाव व इगतपुरी तालुक्यात अतिवृष्टीमुळे नुकसान झाल्याची नोंद कृषी विभागाने घेतली आहे. २३ ते २५ सप्टेंबर दरम्यान ८४ हेक्टरवर नुकसान झाल्याचा प्राथमिक अहवाल कृषी विभागाने सादर केला आहे.

जिल्ह्यात आणि खरीप पिकांची कापणी सुरू असताना पावसाने हजेरी लावल्याने मका, सोयाबीन, बाजरी या पिकांचे प्रमुख नुकसान आहे. याशिवाय अनेक भागात कांदा लागवडी पाण्याखाली गेल्याने त्या खराब झाल्या आहेत. तर अनेक ठिकाणी रब्बी कांदा रोपवाटिका तयार झाल्या असताना पाण्याच्या प्रवाहामुळे रोप व बियाणे वाहून गेल्याने नुकसान वाढलेले आहे. त्यामुळे शेतकऱ्यांना मोठा फटका आहे.

कृषी विभागाच्या अहवालानुसार नुकसान झालेल्या नांदगाव तालुक्यामध्ये ८ गावांत १८२ तर इगतपुरी तालुक्यातील एका गावात १२४ शेतकरी अशा ९ गावांमध्ये हे नुकसान असून ३०६ शेतकऱ्यांचे नुकसान झाल्याचे नमूद केले आहे.

नांदगाव तालुक्यातील पूर्व भागातील न्यायडोंगरी महसूल मंडलात अतिवृष्टीची नोंद झाली आहे. या परिसरात काही शेतकऱ्यांच्या कांदा रोपवाटिका वाहून गेल्याने त्यांना प्रस्तावित लागवडी करण्यास मोठा अडथळा निर्माण झाला आहे. त्यामुळे दुबार रोपवाटिका निर्मितीची वेळ या शेतकऱ्यांवर आली आहेत.

अनेक महसूल मंडलांमध्ये अतिवृष्टीची नोंद झाली नाही. मात्र पावसामुळे नुकसान आहे; मात्र तेथेही पंचनामे करावेत, अशी मागणी शेतकऱ्यांमधून होत आहे. येवला तालुक्यातील पाटोदा मंडलात अनेक ठिकाणी मका भुईसपाट झाला. मालेगावात खरिपातील बाजरी, मका व हिरवा चारा वादळी-वाऱ्यामुळे भुईसपाट झाले. माळमाथ्यासह सर्वच भागांत कपाशी व मका पिकांचे नुकसान झाले आहे.

नांदगावात पंचनामे सुरू

नुकसानग्रस्त शेतकऱ्यांच्या बांधावर प्राथमिक अहवाल प्राप्त झाल्यानंतर पंचनामे सुरू झाल्याचे कृषी विभागाच्या कार्यालयाकडून कळविण्यात आले.

कृषी विभागाच्या प्राथमिक अहवालानुसार झालेले नुकसान

पीक नुकसान (हेक्टर)

मका ४०

भात २५

कांदा १५

कांदा रोपवाटिका ४

एकूण ८४