Soybean Crop Damage : काढणीला आलेल्या सोयाबीनला पावसाचा फटका

Nagar News : गेल्या आठ दिवसांपासून राज्यातील विविध भागांत सुरू असलेल्या जोरदार पावसाचा काढणीला आलेल्या सोयाबीनला फटका बसत आहे. बहुतांश ठिकाणी शेतात पाणी साचल्याने काढणी करता येत नाही. काही ठिकाणी काढणी करून टाकलेले सोयाबीन पाण्यात भिजत आहे. त्यामुळे दाण्याला कोंब फुटल्यास त्याचा दरावर परिणाम होण्याची शेतकऱ्यांना भीती आहे.

राज्यात सोयाबीनचे ४१ लाख ४९ हजार ९९२ हेक्टर क्षेत्र आहे. यंदा ५१ लाख ५९ हजार २६७ हेक्टरवर म्हणजे १२४ टक्के पेरणी झालेली आहे. यंदा सरासरीपेक्षा दहा लाख हेक्टर क्षेत्र अधिक आहे. नगरसह बुलडाणा, अकोला, वाशीम, अमरावती, यवतमाळ, वर्धा, नागपूर, लातूर, धाराशिव, नांदेड, परभणी, बीड, छत्रपती संभाजीनगर, सातारा, सांगली भागांत सोयाबीनचे क्षेत्र बऱ्यापैकी आहे.

यंदा पावसाची स्थिती चांगली असल्याने गेल्यावर्षीपेक्षा एक लाख दहा हजार हेक्टरवर अधिक पेरणी झाली आहे. एखाद्या भागातील अपवाद वगळला सोयाबीनसह यंदा खरिपातील पिकांची स्थिती चांगली आहे. राज्यातील बहुतांश भागात आता सोयाबीनची काढणी सुरू झालेली आहे. मात्र गेल्या आठ दिवसांपासून राज्यात जोरदार पाऊस सुरू आहे. या पावसाचा सोयाबीन काढणीवर परिणाम होत आहे.

सततच्या पावसाने सोयाबीन काढणी करता येत नाही. काही भागात काढणी करून टाकलेले सोयाबीनची पावसामुळे सोंगणी करता येत नसून जागेवरच पावसात भिजत आहे. पावसात सतत भिजत असल्याने दाण्याला डाग पडणे, कोंब फुटणे यांसारखे प्रकार झाले तर बाजारात दराला फटका बसण्याची भीती शेतकरी व्यक्त करीत आहेत.

आधीच बाजारात सोयाबीनला दर नाही. त्यात पावसामुळे नुकसान झाल्यास अधिक उत्पादन होऊनही आर्थिक नुकसान सहन करावे लागणार आहे. खास करून बियाणांसाठी वापर होणाऱ्या सोयाबीनला भिजून कोंब फुटला तर अधिक नुकसान होण्याची भीती शेतकरी व्यक्त करत आहेत.