Palghar News : शहरातील हॉटेलमध्ये ‘सॅलड’साठी मोठी मागणी असणाऱ्या ‘झुकिनी’ या परदेशी फळभाजीची पालघरमध्ये प्रायोगिक तत्त्वावर यशस्वी लागवड झाली आहे. जिल्ह्यातील शेतकऱ्यांसाठी उत्पन्नाचे नवे पीक उपलब्ध होईल, अशी अपेक्षा आसनगाव येथील कृषी तंत्र विद्यालयातील प्राध्यापकांनी व्यक्त केली.

‘झुकिनी’ या परदेशी भाजीचे उगमस्थान अमेरिका असले तरी पंधराव्या शतकाच्या सुमारास इटालियन लोकांनी या भाजीच्या लागवडीत सुधारणा केली. ‘झुकिनी’चे बारीक तुकडे तयार करून खाण्यासाठी वापरतात.

फळाच्या गोल चकल्या करून त्यास मीठ लावून ‘सॅलड’ म्हणून कच्च्या स्वरूपात खाल्ल्या जातात. काकडी आणि दुधी भोपळ्याची मिश्रित चव व काकडीसारखेच आकाराने दिसणारे या पिकाचे फळ गर्द हिरवे, पोपटी, राखाडी व पिवळ्या रंगात येते.

आरोग्यासाठी फायदेशीर

‘झुकिनी’ या भाजीत भरपूर प्रमाणात जीवनसत्त्‍वे, स्निग्ध पदार्थ असतात. फळांच्या सालीमध्ये तंतुमय पदार्थ असतात. त्याच्यामुळे हृदयाचे ठोके नियंत्रित राहतात. ‘झुकिनी’च्या फळाचा उपयोग रक्तदाब कमी करण्यासाठी केला जातो. कारण त्या फळांमध्ये पोटॅशियमचे प्रमाण जास्त असते. उच्च प्रकारचा रक्तदाबही नियंत्रित केला जातो.

तिन्ही हंगामात उत्पादन

‘झुकिनी’ तिन्ही हंगामात घेता येते. त्याच्यासाठी एक ते सव्वा किलो बियाणे प्रतिएकरसाठी लागते. उन्हाळी शेतीसाठी दोन किलो प्रतिएकर बियाणे लागते. ‘झुकिनी’च्या वाढीसाठी चांगला निचरा होणारी माती सर्वोत्तम आहे. पीएच ६.५ असलेल्या जमिनीत ‘झुकिनी’ची वाढ चांगल्या प्रकारे होते. प्लास्टिक प्रो ट्रे मध्ये ‘झुकिनी’ रोपे तयार करतात. तसेच ग्रीन हाऊसमध्येदेखील वाढविता येतात.