Yavatmal News : तुपटाकळी (ता. दिग्रस) येथे दीपक आनंदवार यांच्या शेतावर शेतकरी संघटनेच्या वतीने बंदी असलेल्या तणाला प्रतिकारक जीनचा समावेश असलेल्या (एचटीबीटी) कापूस बियाण्याची लागवड करण्यात आली. सविनय कायदेभंग आंदोलन करीत ही लागवड झाली.

या सविनय कायदेभंग आंदोलनानिमित्त आयोजित कार्यक्रमात ज्येष्ठ शास्त्रज्ञ डॉ. सी. डी. मायी यांनी मार्गदर्शन केले. ते म्हणाले, ‘‘कायदेशीररीत्या एचटीबीटी नियंत्रणमुक्‍त केल्यास शेतकऱ्यांना कापूस पिकाचे व्यवस्थापन चांगल्या पद्धतीने करणे शक्‍य होईल. त्यामुळे सरकारने या संदर्भाने पावले उचलण्याची गरज आहे.’’

‘‘भारताला दर्जेदार एचटीबीटी कापूस, सोयाबीन आणि मका बियाण्यांची गरज आहे. या माध्यमातून कीड व्यवस्थापनासह तणनियंत्रणही कमी खर्चात शक्‍य होईल. त्यामुळे याला परवानगी मिळावी, याकरिता सरकारने पुढाकार घेतला पाहिजे,’’ अशी अपेक्षा डॉ. मायी यांनी व्यक्त केली.

शेतकरी संघटनेचे (शरद जोशीप्रणीत) अध्यक्ष ललित बहाळे म्हणाले, ‘‘संयुक्त राष्ट्राच्या अन्न आणि औषध प्रशासनाने मानवी वापरासाठी अत्यंत कमी गॉसिपॉल असलेली सरकी मंजूर केली आहे. अमेरिकेत सरकी पावडर प्रोटीन म्हणून खातात. अल्ट्रा-लो गॉसिपॉल कापूस आनुवंशिकरीत्या सुधारित आहे. आनुवंशिक बदलाने रंगीत कापसाचे उत्पादन शक्‍य आहे.’’

शेतकरी संघटनेचे माजी अध्यक्ष गुणवंत पाटील, तंत्रज्ञान आणि कृषी विस्तार आघाडीचे प्रमुख मिलिंद दामले, विजय निवाल, माजी आमदार वामनराव चटप यांनीही या वेळी मार्गदर्शन केले. शेतकरी संघटनेचे जिल्हा अध्यक्ष राजेंद्र झोटिंग, देवेंद्र राऊत, दीपक आनंदवार, चंद्रशेखर देशमुख, हिंमतराव देशमुख, पंडित भेंडे, डॉ. गजानन पारखी, अक्षय महाजन, गोपाळ भोयर, अमोल जवादे, भास्कर पाटील, राहील पठाण, कृष्णराव भोंगाडे, मधुसूदन कोवे, सोनाली भरगड आदी उपस्थित होते.