Sangli News : खानापूर, तासगाव, पलूस, कडेगाव तालुक्यांना दिशादर्शक असलेल्या आरफळ योजनेचे आवर्तन लांबले आहे. आळसंद, वाझर, बलवडी, आंधळी, मोराळेसह अन्य गावांतील योजनेच्या लाभक्षेत्रातील पिके पाण्याअभावी कोमेजू लागली आहेत. विहिरी, तलाव कोरडे पडले आहेत. आरफळ उपसा सिंयन योजनेचे आवर्तन सुरू करावे, अशी मागणी शेतकऱ्यांकडून होत आहे.

दशकापूर्वी आरफळ योजना सुरू झाली. लाभक्षेत्रातील शेतीला मोठा लाभ झाला. शेतकऱ्यांनी उपलब्ध पाण्यावर कष्ट घेतल्याने ऊस, केळी, हळद, भाजीपाला पिके डोलू लागली आर्थिक परिवर्तन होऊ लागले.

उसाचे क्षेत्र मोठ्या प्रमाणात वाढले. साखर कारखान्यांना लाभ झाला. शेतकरी आर्थिकदृष्ट्या सक्षम होऊ लागले. यावर्षी पावसाचे प्रमाण कमी राहिल्याने दुष्काळी स्थिती उद्भवली आहे. आरफळ परिसरात पावसाचे प्रमाण कमी झाले. परिणामी धरणात पाणीसाठा कमी झाला. उपलब्ध पाणी सोडण्यास राज्यकर्ते आडकाठी आणत आहेत, अशी तक्रार शेतकरी करीत आहेत.

शेतकऱ्यांनी आरफळच्या पाण्याच्या भरवशावर ऊस, भाजीपाला, अन्य पिके घेतली आहेत. आवर्तन लांबल्याने पिके कोमेजून गेलीत. त्याचा आर्थिक फटका शेतकऱ्यांना बसू लागलाय. संबंधित विभागाच्या अधिकाऱ्यांनी पाणी सोडावे, अशी मागणी आहे.