Nanded News : जिल्ह्यात हिमायतनगर, मुदखेड, उमरी, हदगाव, भोकर तालुक्यात रविवारी (ता. ११) सायंकाळी पाचच्या सुमारास वादळी वाऱ्यासह अवकाळी पाऊस झाला. पावसादरम्यान अनेक भागात गारपीट झाल्याने रब्बीतील गहू, हरभरा, ज्वारी या पिकांचे नुकसान झाले आहे. या दरम्यान मुदखेड तालुक्यात वीज पडून एका २२ वर्षीय शेतकऱ्याचा मृत्यू झाल्याची घटना घडली.

नांदेड जिल्ह्यात रविवारी (ता. ११) सकाळपासून ढगाळ वातावरण होते. यामुळे कमाल तापमानात घट झाली होती. दुपारनंतर ढग जमा होऊन पावसाचे वातावरण तयार झाले. पाचच्या सुमारास जिल्ह्यातील हिमायतनगर, मुदखेड, उमरी, हदगाव, भोकर या तालुक्यांत जोरदार वाऱ्यासह पावसाने हजेरी लावली.

याचवेळी उमरी तालुक्यातील कळगाव, गोरठा, ईश्‍वरनगर तांडा, सोमठाणा, हिमायतनगर तालुक्यातील खडकी, टेंभी घारापूर, जवळगाव, पोटा, कामारी, सरसम, मांडली, आंदेगाव, वटफळी, दुधड, सिरंजनी या गावांना गारांचा तडाखा बसला. किनवट तालुक्यातील धामणदरी, शिवणी, भोकर तालुक्यांतील मोघाळी, कामनगाव, किनी, थेरबन, हाडोळी वादळी वारे व गारांच्या माऱ्यामुळे काढणीला आलेल्या हरभरा, गहू, रब्बी ज्वारी व आंब्याच्या मोहराचे नुकसान झाले आहे.

अचानक आलेल्या पावसामुळे शेतात कामावर असलेल्या शेतकऱ्यांची तारांबळ उडाली. अनेकांनी आसरा शोधण्याचा प्रयत्न केला. गारपिटीमुळे वातावरणात गारवा जाणवू लागला. नुकसानग्रस्त शेतकऱ्यांच्या पिकांचे पंचनामे करून भरपाई देण्याची मागणी करण्यात आली आहे.

दरम्यान, दुसऱ्या दिवशी सोमवारीही (ता.१२) जिल्ह्यात ढगाळ वातावरण आहे. हवामान विभागाने अवकाळी पावसाचा इशारा दिला नसला तरी शेतकरी मात्र सावध झाले आहेत. कृषी विभागाकडून नुकसानीची प्राथमिक माहिती घेण्याचे काम सुरू असल्याचे कृषी विभागाच्या सूत्राने सांगितले.

वीज पडून तरुण शेतकऱ्यांचा मृत्यू

मुदखेड तालुक्यातील पिंपळकोठा (चोर) येथेही अवकाळी पावसाने हजेरी लावली. यावेळी शेतातून घराकडे निघालेल्या दत्ता दिगंबर वाघमारे (वय २२) या तरुणाच्या अंगावर वीज पडल्याने त्याचा मृत्यू झाल्याची घटना रविवारी (ता. ११) सायंकाळी पाचच्या सुमारास घटली. या प्रकरणी मुदखेड तहसीलकडून नोंद घेण्यात आली आहे.