Nanded News : जिल्ह्यात मागील काही वर्षांपासून घटलेल्या कपाशीच्या लागवड क्षेत्रात यंदा वाढ होण्याची शक्यता आहे. सर्वसाधारण क्षेत्र दोन लाख ४१ हजार २८२ हेक्टर असलेल्या नांदेडमध्ये मागील तीन वर्षांत सरासरी एक लाख ८७ हजार ६९१ हेक्टरपर्यंत लागवड खालावली आहे. परंतु आगामी खरिपात यात वाढ होऊन २ लाख १० हजार ५०० हेक्टरवर कपाशीचा पेरा जाण्याचा अंदाज आहे.

तर सोयाबीन चार लाख ५२ हेक्टरवर प्रस्तावित आहे. जिल्ह्यात आगामी खरीप हंगामात सात लाख ७४ हजार ३३६ हेक्टर क्षेत्र प्रस्तावित असल्याची माहिती जिल्हा अधीक्षक कृषी अधिकारी भाऊसाहेब बऱ्हाटे यांनी दिली.

मराठवाड्यात सर्वाधिक कपाशीची लागवड होणारा जिल्हा म्हणून नांदेडची ओळख होती. नांदेड येथे परभणी येथील वसंतराव नाईक मराठवाडा कृषी विद्यापीठाचे कापूस संशोधन केंद्र आहे. या ठिकाणी संशोधित झालेल्या ‘नांदेड -४४’ या कपाशीच्या वाणाला देशात लौकिक मिळाला होता.

या नंतर कपाशीत ‘बिटी’ तंत्रज्ञान विकसित झाल्याने उत्पादन खर्च कमी होऊन उत्पन्नात वाढ होईल, असे वाटत असताना अलीकडच्या काळात बिटीवर कीड-रोगांचा वाढलेला प्रादुर्भाव, गुलाबी बोंडअळीचा अतिरेक तसेच बाजारातील अस्थिर भाव यामुळे शेतकऱ्यांचा कल सोयाबीनकडे वळला होता.

यामुळे दोन लाख ४१ हजार २८२ सर्वसाधारण क्षेत्र असलेल्या कपाशीचे सरासरी क्षेत्र घटून एक लाख ८७ हजार ६९१ हेक्टरवर आले. परंतु आगामी खरीप हंगामात मात्र कपाशीच्या प्रस्तावित क्षेत्रात दोन लाख १० हजार पाचशे हेक्टरपर्यंत वाढीचा अंदाज कृषी विभागाने व्यक्त केला आहे.

आगामी खरिपातील नियोजित पेरणी क्षेत्र (हेक्टर)

पीक सर्वसाधारण क्षेत्र सरासरी क्षेत्र प्रस्तावित क्षेत्र

सोयाबीन ३,५३,३१४ ४,४४,२४५ ४,५२,०००

कपाशी २,४१,२८२ १,८७,६९१ २,१०,५००

तूर ६७,४२३ ६९,२८८ ६६,५००

उडीद २९,६२५ २०,७१० १४,५००

ख. ज्वारी ४४,७४० १७,८७१ १३,०००

मूग २७,३९२ २०,७७० १५,२५०

मका ८२५ ७८७ १,०१२

तीळ ५६५ ३८० ४१०

कारळ ३६१ १७८ १५०

एकूण ७,६४,५९९ ७,६३,३५६ ७,७४,३३६