Sanglin News : सांगली कृषी उत्पन्न बाजार समितीतमधील काही व्यापारी बाहेरच्या बाहेर गुळाचा व्यापार करतात. यामुळे येथील यार्डात गुळाची आवक मोठ्या प्रमाणात कमी झाली आहे. त्याचा फटका हमालांना बसत असल्याने गुळाचे सौदे बंद पाडण्यात आले होते.

या प्रश्नावर मार्ग काढण्यासाठी संचालक, व्यापारी, खरेदीदार आणि हमाल यांचे प्रत्येकी दोन प्रतिनिधी यांची समिती तयार करण्यात आली आहे. आठ दिवसांत ही समिती गूळप्रश्नी निर्णय घेणार आहे, अशी माहिती समितीचे सभापती सुजय शिंदे यांनी दिली.

कोल्हापूर जिल्ह्यात मोठ्या प्रमाणात गुळाचे उत्पादन होते. कोल्हापूरच्या बरोबरीने सांगली बाजार समितीमध्येही गुळाची आवक होत होती. यंदा मात्र येथील गूळ उत्पादन व्यवसाय कमी होत असल्याचे चित्र दिसत आहे.

त्यामुळे सांगली बाजार समितीमध्ये गुळाची आवक कमी होऊ लागली आहे. काही खरेदीदार व अडते सांगलीत परवाना असताना गुळाचा व्यापार परस्पर बाहेर करतात. असा आक्षेप हमालांचा आहे. समितीने यार्डाबाहेर व्यापाऱ्यांनी व्यापार करू नये, अन्यथा कारवाई करू, असा इशारा दिला होता.

गुळाचे सौदे सुरू राहण्यासाठी सरकार, बाजार समितीने वेळीच उपायोजना करण्याची मागणी हमालांनी केली होती. गुळाच्या व्यापाराबाबत तत्काळ तोडगा न काढल्यास तीव्र आंदोलनाचा इशारा हमाल पंचायतीच्या वतीने देण्यात आला होता. त्यावर हमाल प्रतिनिधी, व्यापारी आणि समिती पदाधिकारी यांच्यात बैठक होऊन प्रश्न सोडविण्यासाठी समिती गठीत करण्याचा निर्णय घेण्यात आला आहे.