News: उत्तराखंडमधील उत्तरकाशी जिल्ह्यातील धाराली गावात आज (ता.०५) खीर गंगा नदीच्या वरच्या भागात झालेल्या ढगफुटीमुळे आलेल्या पुराने मोठी हानी झाली आहे. या पुरात आतापर्यंत चार जणांचा मृत्यू झाला असून अनेकजण बेपत्ता असल्याची भीती व्यक्त केली जात आहे.

पुराच्या पाण्याने गावातील घरे, दुकाने, हॉटेल्स आणि रस्त्यांचे मोठे नुकसान केले आहे. सैन्य, एनडीआरएफ  आणि एसडीआरएफ यांच्या टीम्स तातडीने घटनास्थळी दाखल होऊन त्यांनी बचावकार्य सुरू केले आहे. दरम्यान, केंद्र आणि राज्य प्रशासन परिस्थितीवर लक्ष ठेवून असून, मुसळधार पावसाचा इशारा असल्याने परिस्थिती आणखी गंभीर होण्याची शक्यता वर्तवण्यात येत आहे.

उत्तरकाशीचे जिल्हाधिकारी प्रशांत आर्य यांनी या घटनेची पुष्टी केली आहे. ते म्हणाले, "ढगफुटीमुळे आलेल्या या पुराने धाराली गावात मोठ्या प्रमाणात नुकसान झाले आहे. आम्ही सध्या जीवित आणि मालमत्तेच्या नुकसानाचा आढावा घेत आहोत." या भागात अनेक छोटी गेस्ट हाऊसेस, हॉटेल्स आणि रेस्टॉरंट्स आहेत, त्यामुळे बचावकार्यासाठी विशेष काळजी घेतली जात आहे. त्यांनी सांगितले की, सैन्य, राष्ट्रीय आपत्ती प्रतिसाद दल (NDRF), आणि राज्य आपत्ती प्रतिसाद दल (SDRF) यांच्या टीम तातडीने घटनास्थळी दाखल झाल्या आहेत. तसेच, तहसील आणि सार्वजनिक बांधकाम विभागाच्या  टीमही बचावकार्यासाठी कार्यरत आहेत.

केंद्र सरकारही या संकटात सक्रियपणे सहभागी झाले आहे. केंद्रीय गृहमंत्री अमित शहा यांनी उत्तराखंडचे मुख्यमंत्री पुष्कर सिंह धामी यांच्याशी संपर्क साधून परिस्थितीचा आढावा घेतला. त्यांनी इंडो-तिबेटन बॉर्डर पोलिस आणि NDRF यांना तातडीने बचाव आणि मदतकार्यासाठी पाठवण्याचे निर्देश दिले आहेत.

या पुराच्या तडाख्याने धाराली गावातील अनेक घरे, दुकाने आणि रस्ते उद्ध्वस्त झाले आहेत. काही हॉटेल्स आणि होमस्टे पूर्णपणे जमीनदोस्त झाल्याची प्राथमिक माहिती आहे. स्थानिकांच्या मते, १० ते १२ मजूर ढिगाऱ्याखाली अडकले असण्याची शक्यता आहे. 

हवामान खात्याने उत्तराखंडमध्ये विशेषतः डोंगरी भागात १० ऑगस्टपर्यंत जोरदार पावसाचा इशारा दिला आहे. या काळात मुसळधार पावसाची शक्यता आहे, ज्यामुळे परिस्थिती आणखी बिकट होऊ शकते. सध्या हरसिल आणि भटवारी येथून बचाव पथके घटनास्थळी दाखल झाली असून, अडकलेल्या लोकांना शोधण्याचे आणि त्यांना सुरक्षित ठिकाणी हलवण्याचे प्रयत्न सुरू आहेत.

या पुरामुळे गावात मोठ्या प्रमाणात माती आणि ढिगारा जमा झाला आहे. पूराच्या पाण्याने घरे, दुकाने आणि रस्ते यांचा विध्वंस केला असून, गावकऱ्यांमध्ये भीतीचे वातावरण आहे. प्रशासनाने तातडीने बचावकार्य सुरू केले असून, प्रभावितांना मदत पोहोचवण्याचे प्रयत्न सुरू आहेत.