Cloudburst Rain : नागपूर शहरात ढगफुटीसदृश पावसाने दाणादाण

Nagpur News : गेल्या दोन दिवसांपासून पावसाने विदर्भाला अक्षरशः झोडपून काढले आहे. त्यातच शनिवारी (ता. २३) पहाटे साडेपाच वाजेपर्यंतच्या गेल्या २४ तासांत नागपूर शहरात तब्बल ११६.५ मिलिमीटर पावसाची नोंद करण्यात आली. ढगफुटीसदृ‍श बरसलेल्या या पावसामुळे शहराच्या सखल भागात पाणी साचले आहे.

रस्त्यांना तलावाचे स्वरुप आले असून नागरिकांच्या घरातही पाणी शिरले. नागपूर रेल्वे स्थानकही जलमय झाल्याने रेल्वे गाड्यांची वाहतूकही प्रभावीत झाली होती. दरम्यान, उपमुख्यमंत्री देवेंद्र फडणवीस परिस्थितीवर लक्ष ठेवून असून, एनडीआरएफ आणि एसडीआरएफची पथके तैनात करण्यात आली आहेत.

विदर्भातील सर्वच जिल्ह्यांमध्ये पावसाची रिपरिप सुरू आहे. पावसाने खंड दिल्याच्या परिणामी ताणावर असलेल्या पिकांना यामुळे संजीवनी मिळाली असली, तरी शनिवारी बरसलेल्या पावसामुळे मात्र नागपूर शहरातील जनजीवन पूर्णपणे विस्कळीत झाले. अंबाझरीसह, गोरेवाडा तलाव व शहरातून वाहणारे नाले ओव्हर फ्लो झाल्याने अनेकांच्या घरांत पाणी शिरले.

एनडीआरएफ आणि एसडीआरएफ जवानांच्या माध्यमातून आतापर्यंत १४० नागरिकांना सुरक्षितस्थळी हलविण्यात आले. पूरस्थिती हाताबाहेर जाण्याची स्थिती लक्षात घेता अंबाझरी परिसरात लष्कराच्या दोन

तुकड्यांना पाचारण करण्यात आले आहे, अशी माहिती उपमुख्यमंत्री फडणवीस यांनी दिली. जिल्हाधिकारी ईटनकर यांनी शहराचा दौरा करून पूरस्थितीची पाहणी केली. पुरामुळे घरात पाणी शिरले आहे. एकंदरीत स्थितीचा अंदाज घेत शहरातील शाळांना सुट्टी जाहीर करण्यात आली आहे.

विदर्भातही कमी-अधिक पाऊस

भारतीय हवामान खात्याच्य माहितीनुसार, नागपूर शहरात गेल्या २४ तासांत ११६.५ मि.मी. पाऊस झाला. ब्रम्हपूरीमध्ये ५६ मि.मी., गोंदिया ३५ मि.मी., अकोला २.६ मि.मी., अमरावती, बुलडाणा, गडचिरोली १ मि.मी., यवतमाळ १.२ मि.मी., वर्धा ९.६ मि.मी. याप्रमाणे पावसाची नोंद घेण्यात आली आहे.