Parbhani News : परभणी जिल्ह्यात २७ नोव्हेंबर ते ३० नोव्हेंबर झालेल्या मॉन्सूनोत्तर पावसामुळे किन्होळा (ता. परभणी) येथील शेतकऱ्यांच्या कापूस व तूर पीकांचे मोठे नुकसान झाले आहे.

त्यामुळे काढणी पश्चात नुकसान (पोस्ट हार्वेस्टिंग) या जोखीम बाबीअंतर्गत पीकविमाधारक शेतकऱ्यांच्या तक्रारी विमा कंपनीने स्वीकाराव्यात. संबंधित शेतकऱ्यांना विमा परतावा द्यावा, अशी मागणी भारतीय जनता पक्षाचे जिल्हा उपाध्यक्ष तथा परभणी कृषी उत्पन्न बाजार समितीचे संचालक विलास बाबर यांनी जिल्हाधिकारी रघुनाथ गावडे यांच्याकडे केली आहे.

नोव्हेंबर महिन्यातील मॉन्सूनोत्तर पावसामुळे कापूस व तूर पिकांचे नुकसान झालेल्या किन्होळा (ता. परभणी) येथील शेतकऱ्यांनी ऑनलाइन वैयक्तिक तक्रारीद्वारे पीकनुकसानीची माहिती पीकविमा कंपनीला कळविली.

वेचणीच्या वेळी झालेले नुकसान ही बाब काढणी पश्चात नुकृसान (पोस्ट हार्वेस्टिंग) या जोखीम बाबी अंतर्गत येते. परंतु गावातील ९० शेतकऱ्यांच्या तक्रारी विमा कंपनीने नाकारल्या आहेत. शेतकऱ्यांच्या तक्रारी स्वीकाराव्यात.

पंचनामे करावेत, अन्यथा शेतकऱ्यांना उपोषणास परवानगी द्यावी, अशी मागणी विलास बाबर, उद्धव खरवडे, प्रभाकर खरवडे, रावसाहेब जटाळ, भगवान खरवडे, द्वारकादास खरवडे यांनी जिल्हाप्रशासनाकडे केली आहे.