Chandrapur News : जिल्ह्यात पावसाची रिपरिप सुरू आहे. यामुळे शेतकामांनी वेग घेतला आहे. जिल्ह्यात आतापर्यंत ५६ टक्के पेरण्या झाल्या आहेत. जिल्ह्याचे सरासरी पर्जन्यमान १०८४ मिलिमीटर आहे. जून महिन्यात १५२.५ मिलिमीटर तर दोन जुलैपर्यंत ४५.२ मिलिमीटर पाऊस झाला. सलग पडणाऱ्या पावसाने दुबारपेरणीचे संकट टळले आहे.

यंदा सुरुवातीपासून चांगला मॉन्सून राहील, असा अंदाज हवामान खात्याने व्यक्त केला होता. मे महिन्यात जिल्ह्यातील अनेक भागांत अतिवृष्टी झाली. त्याचा मोठा फटका उन्हाळी धानाला बसला होता. हातात येणारे धानाचे पीक उद्ध्वस्त झाले. त्यामुळे खरीप हंगामाकडूनच शेतकऱ्यांच्या आशा होत्या.

हंगामाच्या पार्श्‍वभूमीवर शेतकऱ्यांनी बी-बियाणे, खते, कीटकनाशके खरेदी केली. जून महिन्याच्या सुरुवातीला जिल्ह्यातील काही भागांत थोडाबहुत पाऊस झाला. याच पावसाच्या भरवशावर शेतकऱ्यांनी पेरण्या उरकल्या. मात्र त्यानंतर पावसाने खंड दिला. त्यामुळे दुबारपेरणीचे संकट ओढावण्याची भीती शेतकऱ्यांकडून व्यक्त करण्यात आली होती.

मात्र त्यानंतर पावसाला सुरुवात झाली. कुठे जोराचा तर कुठे रिमझिम पाऊस पडला. त्यामुळे शेतकरी सुखावला आहे. शेतीच्या कामांनी वेग घेतला आहे. खासकरून धानपट्ट्यात पेरणीची कामे सुरू झाली आहेत.

जिल्ह्याचे खरीप हंगामाचे एकूण सरासरी क्षेत्र ४ लाख ६३ हजार इतके आहे. कृषी विभागाने दिलेल्या माहितीनुसार आतापर्यंत जिल्ह्यात ५६ टक्के पेरण्या झाल्या आहेत. जिल्ह्यात प्रामुख्याने धान, सोयाबीन, कपाशी आणि तुरीचे पीक मोठ्या प्रमाणावर घेतल्या जाते.

पीक पेरणी क्षेत्र

धान ४३ हजार ६२८ हेक्टर

सोयाबीन ३० हजार ९५४ हेक्टर

तूर २२ हजार ८२७ हेक्टर

कापूस १ लाख ६१ हजार ९०५ हेक्टर