Amravati News : ‘नोबेल पल्स फूड ग्रोअर्स को-ऑपरेटीव्ह सोसायटी’ (Nobel Pulse Food Growers Co-operative Society) ने हरभरा विपणनाच्या क्षेत्रात एक पाऊल पुढे टाकत थेट शेतकऱ्यांच्या दारावरच खरेदीचा अभिनव पॅटर्न राबविला आहे. त्यामुळे शेतकऱ्यांचा बराच भार हलका झाला आहे.

‘नाफेड’च्या केंद्रांवर शेतकऱ्यांना तासनतास ताटकळत राहावे लागते. यातच त्यांचा वेळ, श्रम आणि पैसाही खर्ची होतो. त्यामुळे ‘नोबेल’ने शेतकऱ्यांच्या दारावर जात हरभरा खरेदीचा निर्णय घेतला. दर्यापूर तालुक्‍यात सात केंद्रांतून ही खरेदी होत आहे.

रामागढ, नरदोडा, हिंगणी, शिवर, पिंपळद, वरुड, दर्यापूर या गावांमध्ये २३०० क्‍विंटल हरभरा खरेदी केला. संस्थेचे संजय आसरे, संदीप लाजूरकर हा उपक्रम राबवित आहेत.