Solapur News : वडवळ (ता. मोहोळ) येथे आज (ता. १) होणारा मतदार नोंदणी व इतर महसुली दाखले वितरण कार्यक्रमाला आमची हरकत आहे. असा उपक्रम, दाखले वितरणासाठी घरोघरी जाऊन कार्यक्रम राबवावा, अशी मागणी भारतीय जनता पक्षाच्या वतीने जिल्हाधिकारी आणि तहसीलदारांकडे करण्यात आली.

मोहोळ विधानसभा मतदार संघातील भटक्या विमुक्त जाती आणि जमातींमधील वंचित लाभार्थ्यांना विविध प्रकारचे महसुली दाखले आणि मतदार नोंदणीसाठी कार्यक्रम वडवळ येथे होणार आहे. वडवळ येथे भटके आणि वंचितांची लोक वस्ती नाही. मोहोळ, पेनूर, टाकळी सिकंदर, पाटकूल, यावली, कामती, लमाण तांडा, नरखेड, मसले चौधरी आदी गावात या समाजाची संख्या आहे.

या गावातील लोकांना वडवळ येथे येणे-जाणे गैरसोयीचे आहे. प्रवास आणि आर्थिक दृष्ट्या परवडणारे नाही. तसेच हा समाज पालावर राहणारा असून सामाजिक, शैक्षणिक, आर्थिक दृष्ट्या मागासलेला आहे. या समाजातील प्रत्येक घटकाला दररोज रोजी-रोटीसाठी गाव सोडून जावे लागते.

या उपक्रमासाठी आल्यानंतर आमचे आर्थिक नुकसान व उपासमार होण्याची शक्यता आहे. त्यामुळे हा कार्यक्रम या गावात न करता समाजाच्या पालावर, तांड्यावर जाऊन राबवावा,’’ अशी मागणी भाजपचे अनुसूचित जाती मोर्चाचे प्रदेश उपाध्यक्ष संजय खिलारे, अनुसूचित जमाती मोर्चाचे प्रदेश उपाध्यक्ष ज्ञानेश्वर भोसले व महेश सोवनी यांनी केली.