Nagpur News : देशभरात खतांबरोबर होणारे लिंकिंग तसेच अप्रमाणित व बेकायदा खतांच्या विक्रीवर केंद्रीय कृषिमंत्री शिवराजसिंह चौहान यांनी तीव्र चिंता व्यक्‍त केली आहे. या संदर्भाने देशातील सर्व राज्य तसेच केंद्रशासित प्रदेशांच्या मुख्यमंत्र्यांना पत्र लिहित त्यांनी या संदर्भाने कारवाईसाठी अभियान चालविण्यास सांगितले आहे.

केंद्रीय कृषिमंत्री चौहान यांच्या पत्रानुसार, कृषी व्यवसाय हा भारताच्या अर्थव्यवस्थेचा कणा आहे. त्यामुळेच शेतकऱ्यांच्या उत्पन्नात स्थिरता ठेवण्यासाठी त्यांना गुणवत्तापूर्ण निविष्ठा, त्यादेखील योग्यवेळी, योग्यदरात मिळणे गरजेचे आहे. शेतकऱ्यांची खताची मागणी लक्षात घेता त्यांना पुरेशा प्रमाणात त्याची उपलब्धता करण्याची जबाबदारी देखील राज्याची आहे.

त्याकरिता राज्यात खतांचा होणारा काळाबाजार, खताची इतर राज्यातील तस्करी, निर्धारीतपेक्षा अधिक दराने विक्री अशा प्रकारांवर नियंत्रण मिळविणे गरजेचे आहे. असे प्रकार आढळून आल्यास संबंधित राज्य सरकारने तत्काळ कारवाई केली पाहिजे. त्याकरिता संबंधित राज्यातील सरकारने खताचे नमुने घेणे व त्याची प्रयोगशाळेत तपासणी या बाबींमध्ये सातत्य राखले पाहिजे.

यातून कमी दर्जाची उत्पादने आढळून आल्यास त्वरित कायदेशीर कारवाईचा बडगा उगारणे अपेक्षित आहे. कायदेशीर कारवाईबरोबरच संबंधितांचा परवाना रद्द करण्याची प्रक्रिया देखील तितक्‍याच प्रभावीपणे होण्याची गरज आहे.

अशा कारवायांना गती मिळावी याकरिता शेतकऱ्यांना असली व नकली निविष्ठांमधील फरक जाणता यावा याकरिता मोहीम राबवित विशेष प्रयत्न करावेत. बोगस निविष्ठांची माहिती सुलभपणे मिळावी याकरिता विशेष प्रणाली विकसित करावी. देशात खत नियंत्रण आदेश १९८५ (वस्तू अधियिम १९९५ अंतर्गत) नुसार कमी गुणवत्तेच्या खतांची विक्री प्रतिबंधित आहे.

लिकिंगविरोधात अभियान राबवा

केंद्रीय कृषिमंत्री शिवराजसिंह चौहान यांनी खतांबरोबर होणाऱ्या लिंकिंगवरदेखील चिंता व्यक्‍त केली आहे. मागणी असलेल्या खताबरोबर नॅनो खते व इतर जैविक उत्पादने थोपविली जात असल्याच्या तक्रारी वाढत्या आहेत. त्याची देखील गांभीर्याने दखल घेत कारवाई करावी, अशा सूचना त्यांनी पत्रातून दिल्या आहेत.