Nashik News : केंद्र शासनाने कांदा निर्यातबंदी त्वरित मागे घ्यावी, शेतकऱ्यांचे पीककर्ज सरसकट माफ करावे. पीक विमा कंपन्यांना संपूर्ण पीक नुकसान भरपाई देण्यास बंधनकारक करावे आदी मागण्यांसाठी काँग्रेसने जिल्हाध्यक्ष डॉ. तुषार शेवाळे यांच्या मार्गदर्शनाखाली अप्पर जिल्हाधिकारी कार्यालयावर आंदोलन करत निवेदन देण्यात आले.

शासनाने निर्यातबंदीचा निर्णय मागे घेऊन शेतकऱ्यांना न्याय द्यावा. शेतकऱ्यांचे पीककर्ज सरसकट माफ करावे. पीक विमा कंपन्यांना नुकसान भरपाई देण्याचे आदेश द्यावेत. शेतकऱ्यांचे उत्पन्न दुप्पट करणार ही केंद्र शासनाची घोषणा हवेतच विरली आहे.

मालेगाव तालुका दुष्काळग्रस्त असल्याने तशा उपाययोजना तातडीने कराव्यात. आदिवासी बांधवांसाठी खावटी कर्ज देण्यात यावे. महागाई नियंत्रणात आणावी. वीज दुरुस्ती विधेयक व स्मार्ट मीटर प्रकल्प रद्द करावा.शेतकऱ्यांचे थ्री फेज वीजपंपाचे बिल माफ करावे. मालेगाव पॉवर सप्लाय लिमिटेड कंपनीने आकारलेले अतिरिक्त दर कमी करावे या मागण्या करण्यात आल्या आहेत.

यावेळी डॉ. राजेंद्र ठाकरे, आदिवासी जिल्हाध्यक्ष मंगला तलवारे, तालुकाउपाध्यक्ष दत्तात्रय खैरनार, वाय. के. खैरनार, श्रीकृष्ण सोनवणे, संजय पवार, डॉ.अरुण पठाडे, एकनाथ कन्नोर, रामभाऊ हाके, डॉ. महिंद्र शिरोळे, काळू सावंत, गोरख पाटील, गणेश देवरे, महादू बच्छाव, गुलाबराव सोनवणे, सरला दळवी, आशाबाई सोनवणे, सरला गायकवाड सहभागी झाले होते.