Sindhudurg News : सिंधुदुर्ग जिल्ह्यातील ३० ते ३५ टक्केच काजूच्या झाडांना मोहोर आल्यामुळे यावर्षी काजूच्या उत्पादनात प्रचंड घट होण्याची शक्यता निर्माण झाली आहे. काजू उत्पादन ३० टक्केच येण्याचा अंदाज असला तरी काजू बीचे दर मात्र १२० रुपयांवरच स्थिरावला आहे. त्यामुळे काजू उत्पादक अडचणीत आले आहेत.

बदलत्या वातावरणाचा यावर्षी काजू हंगामावर मोठा परिणाम झाला आहे. काजूला यावर्षी पहिल्यांदाच तीन टप्प्यात मोहर आला. मात्र तरीही ३० ते ३५ टक्केच मोहर आला. हा आलेला मोहरदेखील विविध कीड-रोगांचा बळी ठरला. आंब्याप्रमाणे काजूवर देखील फूलकीडीचा प्रादुर्भाव मोठ्या प्रमाणात झाला.

त्यामुळे काजूच्या उत्पादनात घट होणार हे निश्चित झाले आहे. ज्या शेतकऱ्यांनी काजू व्यवस्थापन काटेकोर केले त्यांनाच ३० टक्के उत्पादन मिळण्याचा अंदाज आहे. परंतु काहींना १० टक्केदेखील उत्पादन मिळण्याची शक्यता नाही. जिल्ह्यातील काजू पिकाचे उत्पादन घेणारी लाखभर कुटुंबे काजू पीक संकटात सापडल्याने अडचणीत येण्याची शक्यता आहे.

एकीकडे उत्पादन कमी असताना दुसरीकडे काजू बीचा दरदेखील १२० रुपयांवरच स्थिरावला आहे. काजूची प्रमुख बाजारपेठ असलेल्या बांदा बाजारपेठेत काजू हंगामाच्या सुरुवातीला १२६ रुपये प्रतिकिलोला दर देण्यात आला. परंतु त्यामध्ये घसरण झाली. सध्या काजू बीची आवक अत्यल्प आहे.

आठवडे बाजारात काजू बी नाहीच

जानेवारीच्या अखेरीपासून आठवडे बाजारात काजू बी खरेदी-विक्री सुरू होते. परंतु यावर्षी फेब्रुवारी संपत आला तरी अनेक आठवडे बाजारांत काजू बी आलेली नाही. यावरूनच काजू बी उत्पादन आलेख समजून येत आहे.