Yavatmal News : बेंबळा प्रकल्पातील सिंचनासाठी दिलेली जमीन शेतकरी तसेच ग्रामपंचायतीला विश्‍वासात न घेता सुपीक जमीन वनविभागाला देण्यात आली आहे. या विरोधात दाभा, पहूर येथील ग्रामस्थांनी बेंबळा कार्यालयात धडक देत जमीन रद्द करण्याची मागणी केली आहे.

बेंबळा प्रकल्पातील सुपीक तसेच लागवडीखाली असलेली शेतजमीन परस्पर वनविभागाला देण्यात आली आहे. यामुळे उर्वरित शेतजमीन व लगत असलेल्या शिक्षणसंस्था, पहूर पुनर्वसन यांचा कोणताही विचार करण्यात आलेला नाही.

चुकीच्या सर्वेमुळे जास्तीची जमीन संपादित करण्यात आल्याचा आरोप नागरिकांचा आहे. याशिवाय, शेतजमीन सिंचन प्रकल्पाला दिली असता ती वनविभागाला कशी देण्यात आली, यावरही नागरिकांनी आक्षेप घेतला.

शेतकऱ्यांना अत्यल्प मोबदला देऊन बोळवण केल्याचा आरोप आहे. उर्वरित जमिनीवर गावाचे पुनर्वसन करून वन्यप्राण्यांचा त्रास होण्याची शक्यता वर्तविली आहे. वनविभागाला दिलेली जमिन रद्द करावी, अन्यथा उपोषणाचा इशारा दाभा व पहूर येथील ग्रामस्थांनी निवेदनातून दिला आहे.