Latest Agriculture News : पैठणपासून गोदावरी नदीवर बांधण्यात आलेल्या विविध बंधाऱ्यात पावसाळा संपत आला तरीही जलसाठा वाढलाच नाही. गतवर्षी शंभर टक्के तुडुंब भरलेले बंधारे यंदा अर्धवट स्थितीत असून येणाऱ्या हंगामात शेतीसह पिण्याचे पाणी, जनावरांच्या चारा-पाण्याचा प्रश्‍न गंभीर होणार आहे.त तर बंधाऱ्याखालील अनेक गावांतील नदीपात्र कोरडेठाक राहणार आहेत.

परिसरातून वाहणाऱ्या गोदावरी नदीवरील बंधाऱ्यामुळे घनसावंगी, परतूर तर पलीकडच्या काठावरील गेवराई, माजलगावसह विविध गावांना शेतीसाठी पाणी मिळते. या पाण्यावर मोठ्या प्रमाणात ऊसाची लागवड केली जाते. गेल्यावर्षी सर्व बंधारे शंभर टक्के भरले होते.

यावर्षी मात्र एकही बंधारा शंभर टक्के भरला नसून मोठा पाऊस नसल्याने नदी-नाले, तलाव, विहिरी, कूपनलिका तहानलेल्याच आहेत. दरम्यान बंधाऱ्यात पाणी नसल्याने यंदा गोदाकाठच्या परिसराला दुष्काळाशी सामना करावा लागणार आहे, तर बंधाऱ्याखालच्या नदीपात्रांचे मात्र वाळवंट होणार आहे.

राजाटाकळी-शिवणगाव बंधाऱ्याखालील भादली, सिरसवाडी, गुंज यासह पलीकडच्या काठावरील अकरा गावांतील शेतकऱ्यांना दरवर्षीच पाण्यासाठी आंदोलने करावी लागतात. पावसाळ्यात गोदावरीला पूर येतो तर कधी वरचे बंधारे ओव्हरफ्लो झाल्यास गोदावरीत पाणी सोडल्या जाते.

हे पाणी सरळ खाली लोणीसावंगीच्या बंधाऱ्यात जाते. पुन्हा पात्र कोरडेठाक राहते. गुंज येथे मिनी बंधाऱ्याची मागणी अद्यापही पूर्ण झाली नाही. यामुळे या लोकांची परिस्थिती धरण उशाला आणि कोरड घशाला अशीच असते.