Latur News: शहर आठवडे बाजारात भाजीपाला भाव मागील एक महिन्यापासून स्थिर आहेत. सोमवारच्या (ता.३०) बाजारात वांग्याचा सर्वाधिक असा १२० रुपये किलोप्रमाणे भाव होता, तर बटाटे मात्र वीस रुपये किलोप्रमाणे विक्री झाले. विशेष म्हणजे कांद्याचा भाव दहा ते पंधरा रुपयांपर्यंत होता.

अहमदपूर शहर आठवडी बाजार दर सोमवारी जिल्हा परिषदेच्या मैदानावर तर शुक्रवारी थोडगा रोड येथे भरतो. तालुक्यातील तांबट सांगवी, लांजी, विळेगाव, कोपरा, सोनखेड, मानखेड, मोघा, धानोरा, तीर्थ, मोहगाव, दगडवाडी, हंगेवाडी, किनगाव, कोळवाडी या गावासह लातूर जिल्ह्यातील रेणापूर, उदगीर, नांदेड जिल्ह्यातील कंधार तर परभणी जिल्ह्यातील गंगाखेड येथून अहमदपूर बाजारपेठेत उत्पादक शेतकरी भाजीपाला विक्रीसाठी आणतात.

दरम्यान, सोमवारी बाजारात भेंडी, दोडके, कारले, कोबी, चवळी, सिमला मिरची, मटकी प्रत्येकी ८० रुपये किलो, हिरवी मिरची, टोमॅटो प्रत्येकी चाळीस रुपये, कांदे दहा ते पंधरा रुपये किलो, मेथी २५ रुपये पेंडी दहा रुपये पेंडी, पातीचे कांदे पंधरा रुपये पेंडी, भोपळा दहा रुपये नग असे भाव होते.

लाल मिरची स्वस्त

मागील महिन्यात २४० रुपये प्रति किलो असलेल्या लाल मिरचीने ग्राहकांच्या डोळ्यांत पाणी आणले होते. आता मात्र लाल मिरचीचे भाव घसरले आहेत. सोमवारच्या आठवडे बाजारात १३० रुपये किलो प्रमाणे लाल मिरची विकली गेली.

ग्राहकांची संख्याही मंदावलेली

सध्या पेरणीचे दिवस असल्याने व पाऊस पडत असल्याने आठवडी बाजारात खरेदीदारांची संख्या मंदावली होती. सोमवारी आठवडे बाजारात दुपारी पाऊस आल्याने भाजीपाला विक्री करणारे शेतकरी व भाजीपाला खरेदीसाठी आलेल्या नागरिकांची धावपळ झाली.