Pune News : सरकारच्या शेतीमाल निर्यात बंदी विरोधामध्ये सर्व संघटनांच्या वतीने शेतकरी संघर्ष समितीची स्थापना केल्यानंतर समितीने सरकारची नाकेबंदी करण्याचा निर्णय घेतला असल्याची माहिती शरद जोशी विचारमंच शेतकरी संघटनेचे राष्ट्रीय अध्यक्ष विठ्ठल पवार यांनी पत्रकार परिषदेमध्ये दिली.

शरद जोशी विचारमंच शेतकरी संघटनेच्या वतीने नवी पेठेतील श्रमिक पत्रकार भवन येथे सोमवारी (ता.१) पत्रकार परिषद घेण्यात आली होती. त्या वेळी नाना बच्छाव, दीपक पगार, भानुदास शिंदे, धनंजय काकडे, सरफराज शेख, सूर्यकांत काळभोर, कैलास खंडबहाले, प्रवीण जेठेवाड, सुभाष करांडे, अनिल भांडवलकर, विश्‍वास जगताप आदी उपस्थित होते.

विठ्ठल पवार म्हणाले, की केंद्र आणि राज्य सरकारचे सुलतानी निर्णय आणि अस्मानी संकट यामुळे राज्य आणि देशातला शेतकरी सातत्याने कर्जबाजारी होत आहे. त्यामुळे तो आर्थिक सामाजिक आणि शैक्षणिक क्षेत्रात सापडल्याने कर्जबाजारी होऊन आत्महत्या करतो आहे.

सर्व प्रदेश समन्वयकांनी आपापल्या भागात आठ जानेवारीपासून राज्यामध्ये शेतकऱ्यांनी कुठलाही शेतीमाल बाजार समितीला पाठवू नये. राज्यातल्या सर्व ३०५ बाजार समित्या आणि ६०० उपबाजार समित्यांनी आठ जानेवारीपासून संपात सहभागी व्हावे.

सर्व युवकांनी गावकडचा कोणताही शेतीमाल बाजार समितीकडे जाणार नाही, याची खबरदारी घ्यावी. यापुढे राजकीय पुढाऱ्यांना गावामध्ये प्रचारासाठी येऊ देऊ नये, कुठल्याही पक्षाचा प्रचार गावामध्ये होऊ देऊ नये, शेतकऱ्यांच्या सर्व प्रकारच्या शेतीमालाला किमान उत्पादन खर्च निघेल इतकी किंमत द्यावी, अशा विविध मागण्या निवेदनात केल्या आहेत.