Parbhani News: माजी पंतप्रधान राजीव गांधी यांनी सर्वात प्रथम देशात सद्भावना यात्रेची सुरुवात केली. हर्षवर्धन सपकाळ यांनी महाराष्ट्रात सद्भावना यात्रा सुरू केली आणि पहिल्याच यात्रेच्या घोषणेनंतर एका मंत्र्याला राजीनामा द्यावा लागला.

भाजप व राष्ट्रीय स्वयंसेवक संघ जाती धर्माच्या नावावर देशात विष पसरवून दुही माजवण्याचे काम करत आहे. म्हणून सद्भावना वाढीस लागावी यासाठी काँग्रेस ही यात्रा काढत असून यापुढेही राज्यात अशाच यात्रा काढण्यात येतील, असे प्रभारी रमेश चेन्नीथला म्हणाले.

महाराष्ट्र काँग्रेसचे प्रभारी रमेश चेन्नीथला यांच्या प्रमुख उपस्थितीत व प्रदेशाध्यक्ष हर्षवर्धन सपकाळ यांचा नेतृत्वाखाली सोमवारी (ता. ५) परभणी शहर काँग्रेस कार्यालयापासून संविधान बचाओ पदयात्रा काढण्यात आली. या यात्रेची सांगता संविधान संमेलनाने झाली. विधिमंडळ काँग्रेस पक्षाचे नेते विजय वडेट्टीवार,  गोव्याचे प्रभारी माणिकराव ठाकरे,  काँग्रेस वर्किंग कमिटीचे सदस्य व प्रदेश कार्याध्यक्ष नसीम खान, 

खासदार चंद्रकांत हंडोरे,  खासदार प्रणिती शिंदे,  अखिल भारतीय काँग्रेस कमिटीचे सचिव कुणाल चौधरी,  यू. बी. व्यंकटेश,  खासदार डॉ. कल्याण काळे,  खासदार रवींद्र चव्हाण,  प्रदेश उपाध्यक्ष व यात्रेचे समन्वयक मोहन जोशी, विजय वडेट्टीवार यावेळी म्हणाले, की सद्भावना यात्रेच्या माध्यमातून समाजा-समाजाला जोडण्याचे काम होत आहे.

बहुजन समाज एकत्र असणे ही काळाची गरज : सपकाळ

 प्रदेशाध्यक्ष हर्षवर्धन सपकाळ म्हणाले, की  राहुल गांधी यांनी जातिनिहाय जनगणनेची मागणी लावून धरल्याने मोदी सरकारला निर्णय घ्यावा लागला. जातिनिहाय जनगणना झाली तर मराठा आरक्षणाचा प्रश्न मार्गी लागेल. ओबीसीला २७ टक्के आरक्षण आहे ते सुद्धा ६५ टक्क्यांपर्यंत वाढू शकते. भाजप मात्र जाती जातीत भांडणे लावत आहे अशावेळी बहुजन समाज एकत्र असणे ही काळाची गरज आहे.