Nagpur News : जैविक शेतीकरीता लागणाऱ्या निविष्ठा बाजारातून खरेदी केल्यास उत्पादकता खर्च बचत होण्याऐवजी त्यात वाढ होते. त्यामुळे शेतकऱ्यांनी अशाप्रकारच्या निविष्ठांच्या उत्पादनासाठी बांधावरील लॅब उपक्रम राबविण्यासाठी पुढाकार घ्यावा, असे आवाहन आत्मा तालुका तंत्रज्ञान व्यवस्थापक शिल्पा टेंभूर्णीकर यांनी केले.

पारडी येथील संजय बंड यांच्या शेतावर आत्मा तसेच कृषी विभाग यांच्या संयुक्‍त सहकार्याने आयोजित जैविक शेती प्रशिक्षण वर्गात टेंभूर्णीकर बोलत होत्या. जय भवानी शेतकरी महिला समूहाद्वारे गावपातळीवरील या प्रशिक्षणाचे आयोजन करण्यात आले होते.

प्रशिक्षणामध्ये दशपर्णी अर्क तयार करण्याची पद्धती, गांडूळ खत युनिटची उभारणी, त्याकरिता लागणारे साहित्य, ट्रायकोकार्ड तयार करण्याची पद्धत त्यासोबतच बांधावरील लॅब याविषयी माहिती देण्यात आली.

जैविक निविष्ठांचा वापर वाढल्यास जमिनीची सुपिकता वाढणार आहे. मात्र त्याकरिता लागणाऱ्या निविष्ठांची खरेदी बाजारस्तरावरून केल्यास त्यामुळे खर्च कमी होण्याऐवजी वाढेल. ही बाब लक्षात घेता बांधावरच किंवा शेतातच अशाप्रकारच्या निविष्ठा उत्पादनावर शेतकऱ्यांनी भर दिला पाहिजे.

सामूहिकस्तरावर अशाप्रकारच्या निविष्ठा उत्पादनासाठी युनिटची उभारणी करावी. बांधावरील लॅब हा उपक्रमही त्यात महत्त्वाकांक्षी ठरत असल्याचे या वेळी सांगण्यात आले. या वेळी मनीषा शेवाळे, योगेश मानकर, प्रगती वासेकर, राकेश कुकडे, मनीषा पडोले यांची उपस्थिती होती.