Sugarcane Rate Bidri Sugar : गत हंगामात गळितास आलेल्या उसाला ३ हजार ४०७ रुपये अंतिम ऊसदर देणार असल्याची घोषणा बिद्री सहकारी साखर कारखाना व्यवस्थापनाने केली होती. दरम्यान दिवाळीच्या पार्श्वभूमीवर बिद्री (ता. कागल) येथील श्री दूधगंगा वेदगंगा सहकारी साखर कारखान्याने वाढीव ऊसदराचा १०७ रुपयांचा दुसरा हप्ता ऊस उत्पादकांच्या बँक खात्यावर वर्ग केल्याची माहिती कार्यकारी संचालक के. एस. चौगले (ता.२०) यांनी दिली.

या आधी कारखान्याने दोन टप्प्यांत ३ हजार ३०० रुपये उत्पादकांना दिले होते, तर आता उर्वरीत १०७ रुपयांचा हप्ता दिल्याने कार्यक्षेत्रातील ऊस उत्पादक शेतकऱ्यांनी समाधान व्यक्त केले.

कार्यकारी संचालक चौगले म्हणाले, ‘२०२३-२४ च्या गळीत हंगामात कारखान्यात ९ लाख ५४ हजार ७७६ मेट्रिक टन उसाचे गाळप झाले असून त्यापासून ११ लाख ९८ हजार ७०० क्विंटल साखर पोत्यांचे उत्पादन झाले आहे. सरासरी उतारा १२.५५ इतका मिळाला आहे. त्यानुसार प्रतिटन ३ हजार २०० रुपयांप्रमाणे ३०५ कोटी ५२ लाख रुपये यापूर्वी आदा केले आहेत कारखान्याच्या निवडणुकीनंतर नूतन संचालक मंडळाच्या पहिल्याच बैठकीत प्रतिटन रुपये २०७ इतका वाढीव ऊसदर दोन हप्त्यांत देण्याची घोषणा केली होती.’

गणेशोत्सवात पहिल्या हप्त्याची प्रतिटन १०० रुपयांप्रमाणे होणारी ९ कोटी ५२ लाख रुपये रक्कम आदा केली आहे. कारखान्याच्या वार्षिक सर्वसाधारण सभेत उर्वरित १०७ रुपये दिवाळीला देण्याचे जाहीर केले होते. त्यानुसार दुसऱ्या हप्त्याची १०७ रुपयांप्रमाणे होणारी रक्कम १० कोटी २१ लाख ऊस पुरवठादारांच्या बँक खात्यावर वर्ग केली आहे. यावेळी कारखान्याच्या विविध विभागांचे खातेप्रमुख, अधिकारी उपस्थित होते.