Kolhapur Market Committee : तोलाईदारांच्या वेतनाचा पेच कायम, बाजार समिती अन् अडत्यांनी दाखवले एकमेकांकडे बोट

Market Yard Kolhapur : शेती उत्पन्न बाजार समितीच्या मान्यतेने २३ तोलाईदारांची भरती झाली. त्या तोलाईदारांना वेतन व काम देण्यावरून पेच निर्माण झाला आहे. बाजार समिती, माथाडी असंरक्षित कामगार बोर्ड व अडते असे घटक एकमेकांकडे बोट दाखवत आहेत. यातून आज चौथ्या दिवशीही तोलाईदारांच्या वेतनाचा पेच कायम राहिला आहे.

शेती उत्पन्न बाजार समितीच्या शाहू मार्केट यार्डात नोंदणीकृत अडत्यांकडे येणाऱ्या शेतीमालाचे वजन करण्यासाठी तोलाईदाराची नियुक्ती करण्यात येते. त्यानुसार १०८ तोलाईदार मार्केट यार्डात पूर्वीपासून कामावर आहेत. त्यांच्या नियुक्त्या कायम असताना आठ महिन्यांपूर्वी बाजार समितीच्या संमतीने आणखी २३ तोलाईदारांची नवीन अतिरिक्त भरती करण्यात आली.

भरतीला माथाडी बोर्डने मान्यता दिली. नव्याने भरती झालेले तोलाईदार कामावर येऊ लागले, पण अडत्याकडे पूर्वीचे तोलाईदार कामावर आहेत, जास्त काम नाही. त्यामुळे नवीन तोलाईदारांना काम व वेतन (मजुरी) देणे अशक्य असल्याचा मुद्दा अडत्यांनी उपस्थित केला. यातून तोलाईदारांना वेतन मिळालेले नाही.

यातून वाद सुरू झाले. हा वाद माथाडी व असंरक्षीत कामगार बोर्डाकडे गेला. तोलाईदाराची भरती बेकायदेशीर असल्याचे अडत्यांचे म्हणणे मांडले. तर आमची नियुक्ती केल्याने आम्हाला काम द्या व वेतन द्या असे नवे तोलाईदार म्हणत आहेत. माथाडी बोर्डाचे निरीक्षक किशोर खैरे यांनी तोलाईदारांना परवाने बाजार समितीने निश्चित केले. त्यामुळे मान्यता दिली, बाजार समितीकडेच दाद मागावी, असे सांगितले. बाजार समितीने अखेर अडत्यांनी तालाईदारांना वेतन द्यावे, असे आदेश काढले. मात्र चौथ्या दिवशीही तोलाईदारांचे वेतन मिळालेले नाही.

तोलाईदारांच्या नियुक्तीवरून संचालक मंडळातही धुसफूस आहे. काही संचालक अतिरिक्त तोलाईदार भरती करू नका, असे सांगत आहेत तर मोजकेच तोलाईदार भरले आहेत. त्यांची अडत्यांना कामासाठी मदत होईल. त्यामुळे तोलाईदारांची भरती गरजेचीच आहे, असे सांगत आहेत. यावर बाजार समिती प्रशासनाने माथाडी असंरक्षित मंडळाने वेतन द्यावे, असे पत्र आज दिले आहे. मात्र प्रत्यक्ष तोलाईदारांना वेतन मिळालेले नाही.