Baramati News : महावितरण प्रशासनातर्फे नुकत्याच झालेल्या बदली व पदोन्नती प्रक्रियेतून बारामती परिमंडलास चार नूतन अधीक्षक अभियंते मिळाले आहेत. परिमंडलाचा अधीक्षक अभियंता पदाचा कोरम पूर्ण झाला आहे. या चारही अधीक्षक अभियंत्यांनी सोमवारी (ता. १५) आपापल्या पदाचा पदभार स्वीकारला.

बारामती परिमंडल कार्यालयात पायाभूत आराखडा विभागाचे प्रमुख असलेले अधीक्षक अभियंता हे पद रिक्त होते. या पदावर बारामती मंडल कार्यालयातील चंद्रशेखर पाटील यांची बदली झाली. सोमवारी दुपारी त्यांनी या पदाचा पदभार स्वीकारला तर बारामती मंडल कार्यालयाच्या अधीक्षक अभियंतापदी नगर शहर तथा ग्रामीण विभागाचे कार्यकारी अभियंता दीपक लहामगे यांची पदोन्नती झाली. त्यांनी नुकताच श्री. पाटील यांच्याकडून बारामती अधीक्षक अभियंता पदाचा कारभार स्वीकारला.

सोलापूर मंडल अधीक्षक अभियंतापदी भांडूप शहर परिमंडलात कार्यकारी अभियंता पदी असलेले सुनील माने यांची पदोन्नतीवर सोलापूर अधीक्षक अभियंतापदी वर्णी लागली. पंढरपूरच्या आषाढी वारीच्या अनुषंगाने माने नियोजनाला सुरवात केली आहे.

कवठे महाकाळ (जि. सांगली) विभागात कार्यकारी अभियंतापदी असलेले बाळासाहेब हळनोर यांची सातारा अधीक्षक अभियंता पदावर बढती झाली. त्यांनी सोमवारी सकाळी सातारा मंडल कार्यालयाचा पदभार स्वीकारून कामाला सुरवात केली.

बारामती परिमंडलात मंगळवारी (ता. २) मुख्य अभियंता सुनील पावडे यांनी परिमंडलाच्या आढावा बैठकीत चारही अधीक्षक अभियंत्यांचे स्वागत केले.