Akola News : लिंबूचे अधिकाधिक उत्पादन घेण्यासाठी बागेला सेंद्रिय आणि रासायनिक खतांचा संतुलीत वापर करणे फायदेशीर ठरेल, असे मत कृषी विज्ञान केंद्राचे विषयतज्ज्ञ गजानन तुपकर यांनी व्यक्त केले.

बाळापूर तालुक्यातील मोजै पिंपळगाव येथे लिंबू पीक व्यवस्थापन या विषयावर शेतीशाळेचे आयोजन करण्यात आले होते. या वेळी ते बोलत होते. या लिंबू पिकाच्या शेतीशाळेला आत्मा यंत्रणेचे तालुका तंत्र व्यवस्थापक व्ही. एम. शेगोकार, उपकृषी अधिकारी आर. टी. मोरे, सहायक कृषी अधिकारी ओम निलखन यांची प्रामुख्याने उपस्थिती होती.

श्री. तुपकर यांनी लिंबू फळबाग लागवडीसाठी योग्य जमीन, जातीची निवड महत्त्वाची असल्याचे सांगितले. पहिल्या वर्षापासून लिंबू पिकाला योग्य प्रमाणात सेंद्रिय आणि रासायनिक खतांचा वापर केल्यास वाढ चांगली होऊन, सातत्यपूर्ण उत्पादन मिळवणे शक्य होते.

तसेच अन्नद्रव्य, सिंचन व्यवस्थापन, लिंबू पिकावरील कीड व रोगाबाबत चर्चा करून तांत्रिक मार्गदर्शनही केले. श्री. शेगोकार यांनी शेतीशाळेची मूळ संकल्पना सांगून शेतीशाळेची सुरुवात कृषी परिसंस्थेचा अभ्यास करून केली.

उपकृषी अधिकारी मोरे यांनी कृषी विभागामार्फत राबवल्या जाणाऱ्या फळबाग योजना, महात्मा गांधी रोजगार हमी योजना, ‘पोकरा’ योजना व कृषी विभागाच्या विविध योजनांविषयी माहिती दिली.

लिंबू पिकाची शेतीशाळा यशस्वी करण्यासाठी पाणलोट समितीचे सचिव भानुदास इंगळे, पाणलोटअंतर्गत गटाचे अध्यक्ष, सचिव, सदस्य, गजानन पातोडे, सुनील पातोडे, हिम्मत महानकार, रमेश फाळके, विनोद पातोडे इतर लिंबू उत्पादक शेतकऱ्यांनी पुढाकार घेतला.