Fertilizer Management : ‘कृषी’कडून खरिपासाठी खतांचे नियोजन

Ahilyanagar News : खरिपात शेतकऱ्यांना खते व बियाण्यांची अडचण येऊ नये यासाठी तीन महिने आधीच कृषी विभागाने नियोजन सुरू केले आहे. खत विक्रेत्यांच्या बैठका घेऊन उपलब्ध खताचे संकलन करून त्याची माहिती उपलब्ध करून दिली जाईल. त्यामुळे नेमके किती खत शिल्लक असून कितीची गरज आहे हे स्पष्ट होईल, असे जिल्हा अधीक्षक कृषी अधिकारी सुधाकर बोराळे यांनी सांगितले.

सध्या खते उपलब्ध असल्याने आर्थिक क्षमता असलेल्या शेतकऱ्यांनी खते खरेदी करण्याचे अवाहन करण्यात आले आहे. सुधाकर बोराळे यांनी सांगितले, की अहिल्यानगर जिल्ह्यात खरीप हंगाम २०२४ मध्ये एकूण खरीप पिकांचे ९ लाख ३२ हजार ३२२ हेक्टर क्षेत्रावर पेरणी झालेली होती. यामध्ये प्रामुख्याने सोयाबीन, कापूस, मका, बाजरी, तूर आणि उडीद या पिकांचे क्षेत्र मोठ्या प्रमाणावर पेरणी झालेली होती.

त्यामुळे येत्या खरीप २०२५ हंगामाची पूर्वतयारी कृषी विभागामार्फत सुरू झालेली आहे. यामध्ये खरिपासाठी आवश्यक बियाणे व खते यांचा पुरवठा वेळेवर आणि मुबलक प्रमाणात होण्यासाठी नियोजन करण्यात आलेले आहे. सध्याचा विचार करता अहिल्यानगर जिल्ह्यात खतांचा मुबलक प्रमाणात साठा उपलब्ध आहे.

युरिया २७ हजार ३३२ टन, एमओपी ११ हजार ४६२ टन, डीएपी ६१३५ टन, संयुक्त खते ४९ हजार ६५६ टन, सिंगल सुपर फॉस्फेट २१ हजार ४४१ टन इतका साठा शिल्लक असून, अंतिम बाबीत ६,६७० टन साठा नियोजनात उपलब्ध असेल असे दिसतेय. खरीप हंगामामध्ये मागील वर्षीप्रमाणे खताचे संरक्षित साठ्याचे नियोजन कृषी विभागामार्फत सुरू आहे.

खरीप हंगाम २०२५ मध्ये शेतकऱ्यांनी तयारीचा भाग म्हणून आपल्या जमिनीचा माती नमुना काढून तपासणी करून घ्यावी व त्यानुसार आपल्याला लागणाऱ्या खतांची खरेदी आताच करून घेतली म्हणजे पेरणीच्या वेळेवर होणाऱ्या गर्दीचा त्रास होणार नाही. तसेच शेतकरी बांधवांना आपल्याला येत्या खरीप हंगामामध्ये लागवड करण्यासाठी आपल्या जमिनीच्या प्रकारानुसार पिकाची माहिती व त्यांच्या वाणाची माहिती कृषी विद्यापीठ किंवा कृषी विभाग यांच्याकडून करून घ्यावी. कोणत्याही एका पिकातील वाणाचा आग्रह धरू नये.

कृषी निविष्ठा खरेदीत काही अडचण आल्यास तत्काळ नजीकच्या तालुका स्तरावरील कृषी विभागात संपर्क करावा, असे आवाहन बोराळे यांनी केले आहे. टंचाई निर्माण न पेरणीच्या वेळी वेळेत शेतकऱ्यांना खते, बियाणे मिळावेत यासाठी कृषी विभाग नियोजन करत आहे.