Jalgaon News : खानदेशात बाजरीच्या मळणीला काही भागात सुरुवात झाली आहे. पीक मळणीवर आले आहे. काही भागात पिकात दाणे पक्व झाले आहेत. यंदा थंडी हवी तशी नव्हती. शेतकरी आगाप पेरणी करीत होते. अनेकदा खानदेशात डिसेंबरच्या मध्यात पेरणी केली जाते. यंदाही पेरणी १५ डिसेंबरनंतर सुरू झाली.

अनेक शेतकऱ्यांनी यंदा कांदा, मका पिकाऐवजी बाजरी पेरणीचे नियोजन केले. काहींनी मका, कांद्याची लागवड कमी करून उर्वरित क्षेत्रात बाजरी पेरणीचे नियोजन केले. यामुळे बाजरीच्या क्षेत्रात घट झाली नाही. यंदा सुमारे साडेसात ते आठ हजार हेक्टरवर बाजरीची पेरणी झाली. मागील हंगामात सुमारे साडेसात हजार हेक्टरवर बाजरी होती.

जळगाव जिल्ह्यात तीन ते साडेतीन हजार हेक्टरवर पेरणी झाली होती. धुळ्यातील शिरपूर, शिंदखेडा व साक्री हे तालुके बाजरीसाठी प्रसिद्ध आहेत. जळगावमधील चाळीसगाव, पारोळा, अमळनेर, भडगाव, जामनेर. धरणगाव व चोपडा भागात बाजरीचे क्षेत्र अधिक असते. धुळ्यातील शिंदखेडा तालुका बाजरीसाठी प्रसिद्ध आहे.

या भागात खरीप व रब्बीतही अनेक शेतकरी बाजरीची पेरणी करतात. सुमारे ९० ते १०० दिवसात बाजरीचे पीक येते. जानेवारीत पेरणी केलेली बाजरी पीक मळणीवर आली आहे. काही भागात मळणी सुरूदेखील झाली आहे. शेतकऱ्यांनी कांदेबाग केळीची काढणी ९० टक्के झालेल्या बागेतही पेरणी केली होती. या क्षेत्रातही पीक जोमात होते. तापी, गिरणा, अनेर नदीच्या क्षेत्रात बेवडसाठी बाजरीची पेरणी झाली होती.

उष्णतेने मजूरटंचाई

उष्णता खानदेशात वाढत आहे. यामुळे मजूरटंचाईदेखील आहे. अशात मजुरांची जुळवाजुळव करताना शेतकऱ्यांच्या नाकीनऊ येत आहेत. बाजरी पीक मळणीवर येत असतानाच खानदेशात पावसाळी वातावरण तयार झाले आहे. यामुळेदेखील शेतकऱ्यांत चिंता आहे. ढगाळ वातावरण निवळल्यानंतर बाजरी मळणीस आणखी गती येईल, अशी स्थिती आहे.