Pune News : ‘‘खेड तालुक्याच्या पश्चिम पट्यातील वाडा मंडळ कार्यक्षेत्रात उन्हाळी बाजरीचे क्षेत्र वाढले आहे. उन्हाळ्यात हमखास उत्पन्न देणारे पीक म्हणून याकडे पाहिले जाते. यंदा १५१५ हेक्टरवर उन्हाळी बाजरीचे पीक फुलोऱ्यात आहे,’’ अशी माहिती तालुका कृषी अधिकारी नंदकुमार वाणी यांनी दिली आहे.

बाजरी हे पीक तसे खरीप हंगामातील पिक मात्र पावसाळ्यात अनिश्चित पडणारा पाऊस त्यातच कधी मुसळधार तर कधी पंधरा पंधरा दिवस पावसाची दडी यामुळे बाजरीच्या पिका पासून शास्वत असे उत्पन्न मिळत नाही.

या शिवाय खेडचा पश्चिम पट्टा हा अतिवृष्टीचा असल्याने या भागात पावसाळ्यात बाजरीचे पीक शक्यच नसल्याने या भागात बाजरीचे पीक घेतले जात नव्हते. मात्र चास कमान धरणाच्या पाण्यामुळे या पट्ट्यातील शेतकऱ्यांना उन्हाळी हंगामातील पिके घेणे शक्य झाल्याने गेली काही वर्षापासून उन्हाळी बाजरीच्या पिकाकडे शेतकरी मोठ्या प्रमाणात वळालेला दिसून येत आहे.

चिखलगाव येथील प्रगतिशील शेतकरी बाळासाहेब गोपाळे म्हणाले, की उन्हाळ्यात बाजरीचे पीक आमच्याकडे हमखास येत असून अवकाळी पावसाचा तडाखा न बसल्यास पिकातून चांगले उत्पन्न मिळते.

पावसाळ्यात शंभर टक्के भाताच्या लागवडी होत असल्यातरी उन्हाळ्यात सर्वच ठिकाणी आता उन्हाळी बाजरीचे पीक घेतले जाते. कारण बाजरीमुळे वर्षभराच्या धान्याची चिंता मिटतेच या शिवाय बाजरीचा बाजारभाव चांगला असल्याने पैसेही मिळतात.