Nashik News: बागलाण तालुक्यात समाधानकारक पावसामुळे मका व इतर पिकांची पेरणी जोरात सुरू आहे. मात्र यासाठी लागणारी रासायनिक खते खरेदी करताना शेतकऱ्यांना मागील काही दिवसांपूर्वी ‘लिंकिंग’ सक्ती करण्याचा प्रकार उघडकीस आला आहे. या प्रकरणी सटाणा येथील सचिन एजन्सीज या कृषी सेवा केंद्राचा परवाना नाशिक जिल्हा कृषी अधिकारी कार्यालयाने निलंबित केला आहे.

ही कारवाई खत नियंत्रण आदेश १९८५ व अत्यावश्यक वस्तू अधिनियम १९५५ अंतर्गत करण्यात आली.शेतकरी संघटनेचे कार्याध्यक्ष भास्कर बागूल यांनी स्वतः व्हिडिओ चित्रीकरण करून या गैरप्रकाराचा पुरावा दिला. त्यानंतर कृषी विभागाने तपासणी मोहीम राबवत संबंधित सेवा केंद्रावर कारवाई केली.

शहरातील सचिन एजन्सीज हे कृषी सेवा केंद्र दोषी आढळल्याने त्यांचा खत विक्री परवाना १४ जुलैपर्यंत निलंबित करण्यात आला आहे. संबंधित विक्रेता यामध्ये लिंकिंग करण्याचा प्रयत्न करताना दिसून आला. मात्र खते विक्री झाल्याचे बिलिंग झालेले नव्हते, असे समजते.

चौकशीत अनेक त्रुटी उघड

नाशिक विभागीय गुणवत्ता नियंत्रण निरीक्षक आणि बागलाण तालुका कृषी अधिकारी कार्यालयाने संयुक्त चौकशी करून अहवाल सादर केला. या अहवालात त्रुटी नमूद करण्यात आल्या. यात रासायनिक खत साठवण व विक्रीसंदर्भातील नियमांचे उल्लंघन साठा व भावफलक अद्ययावत नसणे, एन फॉर्म प्रमाणित नसणे, १९ एप्रिल २०२५ नंतर मासिक प्रगती अहवाल सादर न करणे, विक्री बिलांवर शेतकरी व वितरकाची स्वाक्षरी नसणे, युरिया व नॅनो युरिया एकत्र विक्री केल्याचे निदर्शनास आले आहे.

शेतकरी संघटनेचा इशारा

या कारवाईनंतर तालुक्यात खळबळ उडाली आहे.‘खत लिकिंग’ प्रकारावर आळा बसल्याचे दिसत असून, पुढे कोणत्याही कृषी सेवा केंद्राने लिकिंगची सक्ती केल्यास त्याच दुकानासमोर तीव्र आंदोलन छेडले जाईल, असा इशारा तालुका शेतकरी संघटनेचे अध्यक्ष केशव सूर्यवंशी यांनी दिला आहे.